Awe riba Dia Internashonal pa kombatí korupshon

WILLEMSTAD.- “Korupshon ta un fenómeno sosial, polítiko i ekonómiko kompleho ku ta afektá tur pais, i prinsipalmente paisnan chikí manera Kòrsou.” Pa e motibu aki lider polítiko di partido MAN-PIN, Giselle Mc William ta di opinion ku Kòrsou mester ratifiká e tratado di Nashon Uni pa kombatí korupshon mas lihé posibel.

E ta splika ku korupshon ta mina institushonnan demokrátiko, stroba desaroyo ekonómiko i ta kontribuí na instabilidat gubernamental. “Tambe mester sigui e rekomendashonnan di Transparency International di 2013 pa instituí por ehèmpel Kámara di Integridat pa salbaguardiá integridat gubernamental, transparensia i kombatí korupshon ku sèn di pueblo. Asina ta sòru ku ta usa 100 porshento di e sèn di impuesto pa desaroyo di nos pueblo.”

Un Kámara di Integridat, Mc William ta sigui bisa, lo ta un instituto independiente pa vigilá, investigá, i hasi rekomendashon riba komportashon étiko, desishonnan i prosesonan manera solisitut, destahonan públiko èts. “Pa un pais ku tin un poblashon di 150 mil hende, transparensia no ta solamente un pilar di gobernashon demokrátiko, pero tambe un nesesidat pa prevení korupshon ku por debilitá ekonomia i kibrá konfiansa den nos institushonnan.” Instalashon di un Kámara di Integridat, segun Mc William, mester ta riba e lista di kompromisonan ku gobièrnu di Kòrsou tin ku realisá pa por aportá na bon gobernashon, garantisá integridat den sektor públiko i krea un ekonomia mas fuerte.

“Korupshon ta ataká e fundamentu di institushonnan demokrátiko, mina e proseso elektoral i lei, kreá burokrasia innesesario ku e úniko meta pa hasi prosesonan ménos transparente pa por soborná òf keda soborná. Pasobra ta usa fondonan pa invertí den desaroyo sosial i enseñansa pa metanan koruptivo, e ta limitá desaroyo ekonómiko di Kòrsou. Pa e motibu aki integridat i transparensia gubernamental pa MAN-PIN no ta algu ku por negoshá riba dje”, e lider di MAN-PIN ta finalisá bisando.

Foto:

...Giselle Mc William...