WILLEMSTAD.- Despues di un temporada di karnaval kolorido, kreativo i eksitoso Maduro & Curiel’s Bank a rekonosé i mustra apresio na e talentonan ku a bria riba esenario durante e último lunanan. MCB a invitá e Embahadornan di Karnaval Hubenil, Tiner, Adulto i tambe e finalistanan di Tumba Hubenil pa un enkuentro spesial ku nos miembronan di gerensia Daniela Cohen-Henriquez i Remco Meulens.
Durante un enkuentro ameno i inspirador aki a interkambiá tokante eksperensianan, reflekshon riba e periodo intensivo di preparashon i presentashon.
Durante e enkuentro MCB a otorgá e MCB Art Scholarship. Ku e beka aki, e ganadónan por hasi un siguiente paso den nan desaroyo artístiko. Nan por skohe e arte di nan preferensia pa sigui invertí den nan talento, manera baile, arte visual (inkluyendo dibuho i kreashon di obranan artístiko), teatro, músika i kanto.
E MCB Art Scholarship ta forma parti di e vishon pa invertí den e desaroyo artístiko di e hóben. Arte i kultura ta pilarnan fundamental di nos identidat ku ta konektá generashonnan, ta konta nos historia i ta inspirá inovashon. MCB ta kontribuí na un komunidat mas fuerte, mas kreativo i hóbennan holístiko.
MCB ta felisitá tur ganadó i finalista pa nan gran kontribushon na karnaval. Nos ta animá nan pa sigui krese ku mesun energia i pashon ku nan a mustra riba esenario.