Grupo MCB ta aklará; P’esei su  likidashon

WILLEMSTAD.- Grupo MCB ta aklará un publikashon ku a sali e siman aki relashoná ku likidashon di MCB Group Insurance NV. Ta trata di un publikashon e siman aki den prensa.  Grupo MCB ta duna aklarashon pa evitá posibel malinterpretashon.

Den e artíkulo ta referí na un kompania di seguro di Grupo MCB i esaki a trese pregunta serka algun kliente tokante e aktividatnan di seguro di e grupo. Grupo MCB ta enfatisá ku e likidashon aki ta trata eksklusivamente MCB Group Insurance N.V., un ‘captive insurance company’ ku ta parti di e grupo.

A konsekuensia di desishonnan stratégiko tumá, anteriormente e kompania aki a pèrdè su funshon original i awor no tin ningun aktividat mas bou di su nòmber. Pa e motibu aki a disidí pa likidá e kompania.

E likidashon aki no tin ningun konsekuensia pa e dos otro empresanan relashoná ku seguro den Grupo MCB, ku ta:

• 
  

• MCB Risk Insurance N.V. (MRI), un kompania di seguro establesé pa kubri e riesgonan di bida relashoná ku finansiamentu den Grupo MCB; i

• 
  

• Maduro & Curiel’s Insurance Services N.V. (MCIS), un ‘broker’ di seguro independiente ku ta konsehá personanan partikular i empresanan i ta intermediá den e formalisashon di kontratonan di seguro ku kompanianan di seguro.

• 
  

Tur dos kompania ta operashonal, ta finansieramente sólido i ta kontinuá ku nan aktividatnan sin ningun interupshon. Klientenan por sigui konta ku e mesun servisio profeshonal, eksperensia i sosten ku nan a kustumbrá risibí di e organisashonnan aki.