MCB preparando pa Corona vírus

WILLEMSTAD.- Maduro & Curiel’s Bank, ‘Bo Banko Amigu’ ta sigui e desaroyonan rondó di Corona vírus hopi djaserka i sigur e medidanan ku outoridatnan lokal ta tumando ku e meta pa protehá komunidat i evitá mas tantu posibel ku hopi hende ta keda infektá ku e Corona vírus. Bienestar general i e relashon ku klientenan ta mashá importante pa MCB i nan lo hasi tur lo posibel pa sigui brinda e servisionan ku klientenan a kustumbrá di MCB, tambe den e periodo difísil aki.

Salú i seguridat di tantu empleadonan i klientenan ta keda prioridat di MCB, miéntras nan ta sigui prepará pa por keda brinda nan klientenan e produkto- i servisionan deseá.

Pa e motibu aki MCB a aktivá nan “Plan di Kontinuidat di Negoshi” i a anunsiá interno algun medida operashonal ku nan a tuma pa protehá nan empleadonan di e riesgonan asosiá ku e Corona vírus. Tambe nos a tuma nota ku outoridatnan a anunsiá ku “distansiamentu sosial” ta un di e mihó maneranan pa baha e riesgonan ku e vírus por plama den un komunidat.

P’esei MCB Group a disidí entre otro pa restringí biahenan, repartí diferente tim di personal ku ta traha huntu den diferente departamentu esensial den Banko inkluso traha na kas, kanselá eventonan grandi i pone atenshon spesial na higiena pa medio di informashonnan ku nos ta kompartí internamente ku nos empleadonan. Tambe nos ta antisipá ku nos lo sera i eliminá akseso na algun di nos edifisio- i brènchnan e siman aki.

Gustosamente nos ta pidi nos klientenan pa hasi mas uso posibel di sistemanan elektróniko (òf di distansia) pa Bo servisionan bankario i di pago, manera Online Banking i Mobile Banking, paga ku tarheta di Bankomatiko, usa SMS 1111 pa rekargá bo telefon i hasi mas uso di nos Bankomátikonan.