WILLEMSTAD.- E aña akí, Maduro & Curiel's Bank ta entregá su prestigioso rekonosementu MCB Prize pa di 24 aña konsekutivo. Un premio ku ta rekonosé un persona, evento, organisashon òf kompania ku na nos humilde opinion a sobresalí i/òf a hasi mas impakto positivo den nos komunidat durante e aña akí.  E premio e aña aki a bai pa departamento Epidemiologia bou liderazgo di dr Izzy Gerstenbluth.

Na momentu di entrega di e premio, señor Chicu Capriles a trese lo siguiente dilanti:

“Ken por a pensa na komienso di e aña akí, ku nos lo a haña nos den un situashon asina diferente? Un situashon ku a i ta impedí nos di hasi loke nos a kustumbrá di hasi henter nos bida?”.

El a bisa ku e aña akí, pa nos kuida otro, nos ta obligá na tene distansia. Nos no por duna otro man, ni duna otro un sunchi òf un brasa. Nos no por kanta huntu ni baila i tampoko sinta den seno familiar òf ku grupo di amigu i realmente disfrutá di otro su kompania.

Chicu Capriles a bisa ku ken por a spera ku e persona ku nos ta mira mas den medionan sosial i tradishonal riba un base kasi diario, lo ta un epidemiólogo?

Ken por a spera ku un epidemiólogo lo bira manera un miembro di famia pa nos tur, debí na su konosementu i ekspertisio?

“Naturalmente mi ta refiriendo na Dr. Izzy Gerstenbluth i su tim di Departamento di Epidemiologia, ku pa nos di MCB realmente meresé di gana nos prestigioso MCB Prize 2020.

For di mart di e aña akí, na momentu ku nos Banko tabata un di e proménan ku un kaso positivo di COVID-19 ku Dios grasia a rekuperá i ta rekobrando su salú kompletu atrobe, nos tabata regularmente den kontakto ku Dr. Gerstenbluth.

Nos a mira su kabeinan krese, nos a mira kon el a keda ora el a pela. Nos tabata mir’é tin biaha tur dia òf asta mas ku un biaha pa dia”, segun sr. Capriles.

Dr. Gerstenbluth, manera semper e ta kòrda nos, no a traha e so, pero a traha ku un tim dinámiko ku tambe MCB ta felisitá i gradisí pa e trabou inkansabel i tremendo ku nan a bin ta hasi for di e promé dia ku nos Dushi Kòrsou a keda afektá pa COVID-19.

‘Nos a haña tur sorto di splikashon. El a kontestá semper tur pregunta, na hopi okashon e mesun pregunta mas ku un biaha, i semper ku e mesun pasenshi i elaborashon.

Nos pais por ta orguyoso ku nos tin Dr. Izzy Gerstenbluth i su tim ku for di prinsipio a sa di deliniá e kaminda ku nos mester kana pa tene nos tur riba e dushi isla akí mas seif i sano posibel i liber di e vírùs di Corona.

Dr. Izzy Gerstenbluth ta dòkter di kas i epidemiólogo i hefe di sekshon di epidemiologia i investigashon di Salubridat (mihó bisa: Geneeskunde & Gezondheidszaken) i for di aña 2010 ta asigná komo epidemiólogo nashonal di pais Kòrsou.

E aña akí, Departamento di Epidemiologia bou di liderazgo di Dr. Izzy Gerstenbluth tabatin un papel sumamente importante komo konsehero di Gobièrnu en konekshon ku desishon i medidanan pa prevení i frena plamamentu di COVID-19.

Un vírùs ku a kue nos tur di sorpresa i ku te na e momentunan akí no tin un bakuna ofisial”, segun Chicu Capriles.

El a sigui bisa ku lamentablemente, pero hustamente debí na e vírùs di COVID-19, Dr. Gerstenbluth no por ta presente ku henter su tim di Departamento di Epidemiologia, pero MCB ta sigur ku e lo kompartí e premio akí ku nan tur.

‘Dr. Gerstenbluth i henter Departamento di Epidemiologia, na nòmber di ami, mi tim di gerensia i henter e famia di MCB, Masha Masha Pabien i Danki pa duna asina tantu di boso banda pa protehá i kuida henter komunidat di nos Dushi Kòrsou i pa sigui evitá plamamentu di e vírùs di COVID-19! Nos ta sumamente kontentu ku e trabou ku boso a bin ta hasi, i pa nos no tin un persona mas adekuá i ku ta meresé mas pa risibí nos MCB Prize e aña akí’.

E premio ademas di e ‘award’ ta konsistí di un montante di NAf. 10.000,- ku gustosamente MCBs ta hasi komo donashon na e kousa òf instansia di nan eskoho.

MCB ta realmente apresiá tur loke e tim di Epidemiologia a hasi i mas ku tur kos nos ta hopi agradesido ku un Danki grandi na dr Gerstenbluth i su tim, pa largu tempu nos a sa di kontené plamamentu di e vírùs. ‘Boso a i ta hasi tur loke ta na boso alkanse pa libra nos Dushi Kòrsou di e vírùs horibel akí i nos ta apresiá boso trabou inkansabel den e proseso akí. DANKI.. DANKI.. DANKI.. !

Mi ke sera deseando esnan ku di un forma òf otro ta afektá pa e vírùs di Corona hopi forsa. I tambe mi ke rekordá un i tur pa por fabor kuida bo mes, kuida bo famia, kuida bo sernan kerí i kuida nos Dushi Kòrsou. Nos por logra pa evitá plamamentu di e vírùs akí solamente si huntu nos tur duna di nos banda.Pasa un Dushi Dia i Be Safe!”, palabranan di Chicu Capriles.