WILLEMSTAD.- Maduro & Curiels Bank ta alerta un i tur pa no bira víktima di Scam. Tin un mail ta bayendo rònt kaminda ta pidi e usuario pa e;

Bo karchi kódigo ta bai kaduká. 

Pa prevení diskonekshon di bo akseso online, primi aki awor pa reactiva bo karchi kodigo. 

Si bo no hinka tur e kodigo nan korekto den 24 ora bo profile lo wordu diskonekta. I e mensahe ta firma pa MCB online.

MCB ta alerta klientenan riba e tipo di mailnan aki. MCB ta bisa ku nan nunka ta manda email òf mensahe di teksto pa pidi informashonnan konfidensial manera username, password, e-Pass, Pin Code òf kualke otro informashon personal.

Ta solamente ora yama MCB, nan por puntra pa verifiká algun informashon personal, pa asina MCB por validá si ta e kliente di bèrdat. I te na e momentu ei no ta pidi pa Password i ménos Pin Code. P’esei MCB ta pidi klientenan pa keda alerta i no duna nan informashon.

Tambe MCB ta organisando otro siman un webinar riba seguridat sibernetiko. Ta un webinar grátis i por registrá riba MCB su website pa por partisipá.