Willemstad - Luna di Sèptèmber ta Luna di Limpiesa global. Ku hopi dedikashon i e kompromiso pa sigui duna un man pa tene nos Dushi Kòrsou Limpi i Bunita, koleganan di Maduro & Curiel’s Bank huntu ku nan famia, amigu- i konosínan a uni den e akshon di Curaçao Clean Up djasabra último dia 19 di Sèptèmber 2020.

Nos ta sumamente orguyoso ku apesar di e temporada difísil akí, tòch un kantidat grandi di persona a bini huntu, manteniendo tur regla di COVID-19, i a duna un man pa limpia un parti di área di Brievengat/Jongbloed (un parti di Kaya Thomas Henriquez), Weg naar Santa Catharina i kaminda di Banda Bou (for di Rotònde di Zegu te Landfill). Pa loke ta trata e área di Zegu pa landfill, a konstatá ku tin hopi trabou mas pa hasi i e grupo a disidí ku den luna di òktober ta bolbe reuní pa sigui limpia e parti akí di Kòrsou.

Ya pa 23 aña Maduro & Curiel’s Bank ta partisipá na akshonnan di Limpiesa, motibu pa kual nos ta sigui apoyá i enkurashá diferente proyekto di konsientisashon i ta hasi un apelashon na nos komunidat pa tene nos Dushi Kòrsou limpi.

Den pasado MCB a kontribuí ku entre otro Green Kidz Curaçao i durante e último dos añanan nos ta sigui apoyá e proyekto di Unesco “Trese Bo Tas”, huntu ku entre otro gruponan hubenil di AGPNA i Scouting Antiano. Un proyekto den kual un total di 800 hóben ta haña diferente workshop tokante resiklahe, bida den laman (ku konsentrashon riba nos turtuganan) i limpiesa di nos isla.

MCB ta felisitá e Organisashon di World Clean Up Day Curaçao ku un tremendo trabou, pa nos sigui traha riba un Dushi Kòrsou Huntu, Awe i Mañan!