WILLEMSTAD.- Maduro & Curiel’s Bank a lansa e buki nos Museonan. Esaki a tuma lugá den kuadro di presentashon di e relato anual di e banko pa loke ta trata 2018. E buki ta kontené un splikashon di diferente Museo di Kòrsou, Aruba, Bonaire, Sint Maarten, Saba i Sint Eustatius. Ta duna un splikashon di e palabra ‘museo’ riba su mes, informashon kiko kada Museo ta para p’e i ofresé i ku ilustrashonnan masha bunita di kada Museo. Debí na e kantidat di museo riba nos islanan, mester a hasi un eskoho i no por a duna un relato di kada un, pero patras den e buki ta hasi menshon di tur nos museonan, nan informashon di kontakto i orario. Esaki ta hasí spesialmente pa duna onor na e tantísimo museonan ku nos tin riba nos islanan i ku hopi biaha nos no ta para ketu n’e òf traha tempu pa bishitá.

Maduro & Curiel’s Bank ta spera ku e buki aki lo sirbi komo un empuhe pa nos bishitá nos museonan ku ta ofresé un variashon asina grandi di informashon, opheto i eksperensia úniko.

Durante e siman ku a pasa, den un esfera ameno den kurá di Landhuis Bloemhof, MCB a invitá representantenan di e Museonan ku ta aparesé den e buki i a hasi entrega ofisial di esaki na e invitadonan; kual a keda risibí ku hopi amor i kariño dor di esnan presente.

Skolnan i organisashonnan ku ta interesá por tuma kontakto ku MCB na telefòn: 466 1123 si nan ke un ehemplar di e buki. Manera semper naturalmente tantu e Relato Anual komo e buki ta disponibel riba e website na: mcb-bank.com pa un i tur por disfrutá di dje.