WILLEMSTAD. - Maduro & Curiel’s Bank, Banko Maduro den boka di pueblo a anunsiá ayera tardi ku nan ta bai hasi algun kambio den nan ret di brènch durante e siguiente tres lunanan. Entrante djabièrnè 28 di sèptèmber 2018, MCB lo deskontinuá servisio i sera e brènchnan na Otrobanda i Mangusa. Klientenan di e brènchnan aki por hasi uso di kualke un di e otro 11 brènchnan di MCB. Miéntras e proseso di reorganisashon ta tuma lugá, e brènchnan na Otrobanda i Mangusa lo keda brinda servisio na klientenan te djaweps 27 di sèptèmber 2018.

Despues di e fecha aki, klientenan di MCB Otrobanda por opta pa sigui atendé nan asuntunan bankario den serkania na e brènch na Colon, klientenan di MCB Mangusa por sigui hasi uso di e brènch na Rooi Catootje òf na Brievengat i pronto na e filial digital nobis nobis na Saliña. Naturalmente klientenan por hasi uso di kualke brènch ku nan ta deseá i ku ta kumbiní nan.

Kuponan di trabou

Maduro & Curiel’s Bank ta sumamente orguyoso di su historia largu di trata empleadonan envolví den kualke kambio organisatorio na un manera honesto, desente i ku rèspèt. E empleadonan ku ta laborá na e brènchnan en kuestion lo haña oportunidatnan nobo den Banko ku ta kuadra ku nan abilidatnan i eksperensia.

E enfoke primordial di MCB Group ta p’e ta mihó organisá pa sirbi su klientenan dor di invertí den maneranan mas rápido, kumbiniente i inovativo pa atendé tur asuntu bankario. E konsolidashon di brènch ta unu netamente basá riba efisiensia i ta hasi posibel pa e banko optimalisá uso di su rekursonan pa mehorá produkto i servisionan di Banko aún mas den futuro.

Anteriormente

Ta bon pa informá ku algun aña pasá Banko Maduro a sera e filial na WTC, Breedestraat Punda i tambe esun den Free Zone.