Ultimo lunanan nos ta papia hopi di teknologia i edukashon. Eunice Cijntje a studia den e direkshon aki i el a kompartí su ideanan ku nos. Eunice Cijntje a bai den e direkshon di media, teknologia i inovashon, kuminsando ku su bachelor International Communcation Media. El a skohe pa mas den direkshon di media pa spesialisá. Na Kòrsou el a traha 7 aña den merkadeo. Pero loke el a eksperensiá na Hulanda,  el a buska algu otro na Kòrsou. Sinembargo na 2018 Eunice a sinti ku e mester di un kambio i a bai Hulanda bèk kaminda el a studia Master den inovashon, kual el a terminá aña pasá.

 

Eduká hendenan…

Eunice awor ta bèk na Kòrsou i e ta splika ku por hasi hopi kos ku teknologia i inovashon. E mes ta hasié i no ta algu barata si pasobra mester pasa over pa análogo digital pero por hasi hopi kos i tin asina tantu influensia positivo riba e studiantenan. Tambe e ta hasi e trabou di maestronan mas fásil si usa e strategia korekto. Ku teknologia den edukashon mester komprondé e manera ku ta usa pa eduká e persona/studiantenan, por hasi uso di virtual reality, kòmpiuter, aplikashonnan i tur kos ku tin di aber ku teknologia. Na otro banda mester di e parti di eduká hende di teknologia i kon pa us’é pa mas fásil, e konsekuensianan pasobra den tur kos positivo tin un parti negativo den dje.

 

Tin un kaminda pa kana…

Na Hulanda ta hopi avansá den teknologia den edukashon. Eunice Cijntje mirando e situashon na Kòrsou a bisa ku tin un kaminda pa kana pa por yega pero promé mester analisá promé kiko teknologia ta i kiko e ke men en general na Kòrsou i kon pa ehekut’é na un mihó manera.  Por yega implementá mesora pero ora hasié asina bo tin e efektonan despues ku hopi bia no ta e kos mas mihó ku por a hasi na kuminsamentu. Pero si kuminsá for di e base i analisá kiko por sosodé ku un presupuesto, aki ainda no tin e presupuesto pa yega i implementá mesora. Pero si tin e sabiduria pa kuminsá i eduká e personanan en partikular e dosentenan, e por drenta mas fásil den edukashon mes.

Posibilidat i oportunidat…

Eunice a bisa ku aña pasá ora e tabata na Kòrsou den temporada di ‘lockdown’, el a wak e nesesidat, e posibilidat i oportunidatnan pa kos sosodé. I tur kos ta kuminsá ku kambio; ora COVID a dal Kòrsou tur hende ke bai over riba digital mas lihé posibel. Esei a dun’é e inspirashon pa e hasi algu adishonal. El a skibi algu kòrtiku riba media sosial i ora lunanan a pasa i tur loke el a skibi a kambia bèk den e manera ku tabata normal promé ku e ‘lockdown’. Awor aki e mes a bin bèk i e ta kontentu di tei bèk pasobra e tin oportunidat di brinda su sabiduria i inspirashon i kompartí ku tur hende ku mester di esaki.

 

Kuríkulo den skol…

E ta konsiente ku e sektor di enseñansa na Kòrsou ta hopi sera i no por yega asina fásil den dje. Eunice a bisa ku e ta un persona hopi stratégiko. E ta trahando na universidat i skolnan pa asina for di un edat hóben e por inspirá e generashon pa nan por bai den e direkshon aki. Eunice ta konsiente ku na Kòrsou no tur hende ta asina leu den nan kompania i den sosiedat mes, pero mester kuminsá un kaminda pa sembra e simia pa e krese.

 

Teknologia fo’i chikí…

Eunice ta kere ku inkonsientemente i hopi hende no ta para ketu na dje pero for di edat yòn, muchanan di 3 i 4 ya ta bezig ku teknologia. Nan ta bezig ku kosnan ku e adulto mes no a hasi. E kaweta serka e mucha tei, nan manera di pensa ta kompletamente habri pa e kosnan aki. Pero ora tin di eduká hende riba media i kiko e ta enserá e pro i kontranan i tambe bai mas leu ku teknologia avansá, virtual realidat i kon pa implementá den kompanianan, por kuminsá di edat basta yòn. No tin un edat spesífiko pero por hinka si den kuríkulo den programanan komo workshop.

 

Habilidat di mucha…

E ta wak serka muchanan rònt di dje kon hábil nan ta riba telefòn i iPad i ora kita esaki for di e mucha, nan ta bira kasi histériko, i komo mayor mester papia ku e mucha i purba dirigí nan riba kosnan mas tradishonal i sosial pasobra esei tambe ta un karakterístika ku e mucha mester siña tambe. E mester por siña e parti sosial, hunga pafó i laga e aparatonan di teknologia para un ratu. E parti sosial di e mucha mester keda. I p’esei hopi hende no tin media sosial mes i nan ta pone pa e muchanan tambe no tin e pa kita e digitalisashon ei un tiki i pa e mucha por gosa di e mundu normal, den naturalesa en bes di sinta asosial.

 

Tin e persepshon ku ora ta papia di teknologia i inovashon ta Facebook pero pa Eunice Cijntje esei ta parti di e totalidat. E ta un kontenido di media. No por bisa ki Facebook ta media pero ta un aplikashon e ta forma parti di dje ku ta media.

Uso di telefòn…

Ta dependé e kontribushon na skol si gobièrnu ta finansi’é pa sòru pa e muchanan tin e aparatonan teknológiko pa usa. Den temporada di COVID ku niun hende a spera, ta resultá ku hopi hende ta kana ku un telefòn sin por us’é efisientemente por ehèmpel pa hasi Zoom i Skype i dado momentu no nesesariamente mester di un kòmpiuter.

 

Profundisá…

E echo ku Kòrsou no tin un provedor di Internèt asina barata i stabil ta stroba ku e hende ta profundisá den teknologia i inovashon. Eunice a bisa si ku si tin un bon provedor e kosnan por kana mas lihé. E ta kere mas den e direkshon di edukashon. Eduká un persona pa por us’é mihó posibel i no den sentido ku tin di kumpra laptop pa tur hende pasobra nan tin nan telefòn. Tin otro manera ku por inkorporá esaki den un presupuesto basta abou en bes di kumpra e laptop. Pero meskos ku a duna tur otro kompania di Internèt e chèns pa bira stabil, lo tin di duna esun na Kòrsou tambe un chèns.

 

COVID su malu i bon…

I COVID a tres su kosnan malu pero tambe kosnan bon. Awor aki tur kos ta sosodiendo ‘online’. E problema sinembargo ta sinta serka e hende grandi ku no a kustumbrá. Eunice ta kere ku por eduká nos hendenan grandi tambe. Ounke nan ta den un sistema kaba i ta difísil pa nan pasa otro sistema. E generashon nobo ta bai muchu mas fásil. Loke el a eksperensia ta ku ta hasi tayernan pa e hendenan di mas edat na Hulanda i asina nan tambe por sa kiko e aplikashonnan ku nan tin di usa ta funshoná. No tur hende ta hasi uso di dje, pero nan sa si tin ku tin e posibilidat pa hasié. Eunice ke yega netamente einan. Siña i eduká hende kon traha ku teknologia i asina yuda otro krese.


Teknologia den kuríkulo na skolnan…

Su meta ta purba introdusí teknologia den kuríkulonan na skol. E ke papia ku tur envolví, dekano i kabesnan di skol; e por duna tayernan na e studiantenan di un forma agradabel i no tradishonal pa asina e trese e konosementu ariba i inspirá nan ku esaki ta un otro manera pa hasi karera den dje. Si hasié stratégikamente bon, por hasi hopi ku teknologia i karera. I internashonalmente e ta di gran nifikashon.

 

Agradabel…

 Eunice ta traha na universidatnan na Kòrsou. E ta haña masha agradabel pa trese e konosementu di dje over na studiantenan. E mes tambe ta siñando hopi pa adaptá na kada nivel den enseñansa. E sa ku kambionan no ta tuma lugá di un dia pa otro pero e lo bin si. Ounke e kuríkulo di teknologia no ta den skolnan pero e tin e oportunidat pa duna tayernan na e studiantenan.

 

 

 

 

 

 

LAGA UN KOMENTARIO

Please enter your comment!
Please enter your name here