Otro polis a tèst positivo

WILLEMSTAD.-Miembronan di Kuerpo Polisial tambe a keda infektá ku Corona vírus, asina e bosero di e kuerpo Imro Zwerwer a duna di konosé. Zwerwer a splika ku ya kaba tin diferente medida ku Kuerpo Polisial a  tuma pa garantisá ku ménos di nan miembronan ta keda infektá ku e vírus. Tambe ta asina ku nan a tuma diferente medida di prekoushon.

E bosero a splika mas aleu ku e kolega konserní a hasi tèst i ayera nochi a bira konosí ku el a tèst positivo. Mesora el a informá hefe interino di esaki. For di momentu ku el a kuminsá sinti síntomanan el a bai den karentena i ayera nochi hefe interino a tuma medida. Tanten ya kaba tur hende ku e tabata den kontakto kuné a bai den karentena.

A informá tur miembro di e kuerpo awe i tambe a pidi tur esnan ku tabata den kontakto ku e kolega infektá pa registrá na departamentu di rekurso humano pa despues bai den karentena. Zwerwer a bisa tambe ku prome ku e kaso aki ya kaba kuerpo a tuma vários medida. Na wardanan di polis a tuma medida den sentido ku tur hende ku ta bai hasi denunsia mester traha sita i tambe por hasi denunsia via mail. Ta traha sita pa bai firma e denunsia òf si mester hasi pregunta adishonal.

Den kaso di hendenan ku no tin kòmpiuter òf email ta pidi pa nan yama pa traha sita i di e forma ei ta evitá ku den salanan tin konsentrashon di hende. Otro medida ku a tuma ta ku tur hende ku ta bai un warda di polis mester tin nan tapa boka bistí. A pone handsanitizer na tur warda pa tur hende ku drenta hasi uso di dje. Tur polis ku ta traha den wardanan tambe mester bisti tapa boka. A limitá e kantidat di reunionnan físiko i awor ta trata na hasi mayoria di forma virtual. Finalmente e bosero a bisa ku tur unidat di polis riba kaya ta haña tapa boka i un pakete ku diferente artíkulo pa nan por duna servisio di forma protehá. Mas detaye den edishon di EXTRA.(file foto)