WILLEMSTAD.- Resientemente un mekániko tabata den sala di korte, pa motibu ku el a haña un but pa kore outo sin e dokumentonan.
Segun fiskal durante un kontròl, agentenan polisial a para un vehíkulo pa kontrolá si e papelnan tabata na òrdu.
E vehíkulo no tabata disponé di niun klase di dokumento, di kual e hòmber mekániko aki a risibí un but ku a yega 700 florin.
E akusado a splika korte ku ora e kaba di hasi su trabou, semper e ta bai kore tèst e outonan.
Segun e shofùr e vehíkulo ku el a keda para den dje, no ta su pertenensia i no tabata sa ku esaki no ta disponé di e dokumentonan legal pa subi ku e outo riba kaya.
Riba esaki fiskal a duna di konos’é na e shofùr, ku tur hende mester kontrolá den un outo si esaki ta disponé di su dokumentonan, promé ku e subi kaya kuné.
Fiskal a bisa ku no ta importá si ta trata di vehíkulo di otro hende, pa motibu ku na e momento ei esun ku ta bai kor’é ta responsabel pa tur loke ku sosodé.
Fiskal ta di opinion ku korementu ku un vehíkulo sin niun klase di dokumento ta algu peligroso, mirando ku si surgi un aksidente esaki por hinka e shofùr den basta problema.
Fiskal a bisa di ta tene na kuenta ku e situashon finansiero di e mekániko i tambe ku e no tabata na altura.
Mirando esakinan pa e bia aki, fiskal ta demandá e shofùr na 150 florin di but i 550 florin kondishonal den un periodo di prueba di 2 aña.
Hues a bisa e shofùr ku e ta duna fiskal tur rason.
Segun hues siendo un mekániko promé ku e drenta
kualke outo pa bai tèst, e mester habri e dash-board promé i kontrolá si tur papel ta na òrdu.
Si esaki no ta e kaso hues a rekomendá pa laga e outo para te ora e papelnan tei.
Hues a duna di konosé ku esaki no ta konta solamente pa e mekániko so ku tin ku tèst e vehíkulonan ora e kaba di drecha nan, pero pa tur hende ku ta bai kondusí un outo ku no ta di nan .
Mirando esakinan, hues a bai totalmente di akuerdo ku e demanda di fiskal.