WILLEMSTAD.-  Un siudadano di orígen dominikano a presentá dilanti wes, pa motibu ku polis a par’é den un vehíkulo, ku no tabatin niun dokumento i tampoko plachi di number.

Segun e akusado e ta mekániko i tin vários kliente figo ku e ta drecha outo pa nan i semper e ta bai tèst e outonan ora ku e kaba di drecha esaki.

Dia 7 di febrüari ultimo, polis a  par’é  riba kaminda públiko den un vehíkulo, sin e dokumentonan nesesario. El a splika ku no ta su outo i ku ta tèst el a kaba di tèst esaki.

A resultá ku e vehíkulo no tabatin karchi di kùr, ni e komprobante ku el a paga impuesto, ni tampoko e prueba ku e outo su seguro tabata pagá i banda di esaki no tabatin plachi number na e outo.

Pero manera hopi bia wes a splika den vários kaso di infrakshon di tráfiko, ku tur outomobilista ku ta bai kore outo, aunke no ta di dje, ta responsabel pa esaki.

Esaki a pone ku e akusado a presentá den sala ku su kliente kende ta un persona ku ta manehá un empresa i esaki a trese tur e  dokumentonan konserní.

Mirando esakinan fiskal i wes a tene a konsiderashon ku e akusado i a dun’é un but di solamente 50 florin.