WILEMSAD.- Ayera korte a trata un kaso kontra e hende muhé T.W. (24) i Q.F. (28).
Ta trata di un kaso ku a kuminsá den kaya Reis na Souax , despues ku un vehíkulo a kore bai dal parti patras di un otro.
Segun e deklarashon e ruman hòmber chikí di Q.F. di 17 aña, a kore bai dal parti patras den e outo di e víktimanan di fam Reales. Q.F. su ruman no tabatin reibeweis.
E víktimanan tabata un mama i yu, ku tabata den outo.
Segun e víktima, e hende ku a dal den dje, a baha fo’i outo i kana bin.
Despues nan a mira un muhé kore bin riba bròmer na e sitio.
E muhé a resultá di tabata T.W.
El a kuminsá grita nan, pa despues e kana bai riba e yu muhé di e señora i dal e wanta den su kara.
E señora a deklará ku ora el a bai purba defendé su yu, T.W. a dal e moketa den su kabes, pone ku el a kai.
Segun e señora, un grupo di mas di 15 hende a kore bin riba nan i kuminsá dal e entre nan un rasta. Su orea a keda afektá dor di e slanan ku el a risibí.
Djis despues Q.F. a kore yega i tambe a kuminsá bringa.
El a kana bai riba e yu muhé i trata na ranka su tas . Despues di un ratu, e ta kue e outo di e víktima i bai kuné ku tur nan pertenensia aden.
E víktima a deklará ku Q.F. a bisa nan, ora nan drecha su outo e ta duna nan di nan. Algun ratu despues polis a haña e outo banda di kas di Q.F. sin nada aden.
E víktimanan a duna di konos’é ku den e outo tabatin sakunan di paña, 450 florin, reibeweis i tas.
Q.F. a ninga ku el a kue e outo bai kuné i menasa e hende nan.
Tambe el a ninga di sa algu di e pertenensianan ku tabata den e vehíkulo.
El a bisa ku e sa ken a bai ku e outo, pero ta hasi uzo di su derechi keda ketu.
Hopi testigu a rekonosé Q.F. komo e mekániko ku a bai ku e outo.
Nèt e dia di e suseso Q.F. a kaba di dera su tata.
Ta su tata tabata mekániko i e tabata yud’é.
Fiskal a haña e akusashon probá i a demandá T.W. na 150 ora di kastigu di kual 3 luna kondishonal mas 3 aña di prueba pa maltrato di e víktimanan.
Q.F. a keda demandá na 150 ora mas 3 luna kondishonal pa ladronisia di outo.
Hues den su desishon a bai kompletamente di akuerdo ku e demanda.