WILLEMSTAD.- Rumannan, e selebrashon di Pasku di e aña aki ta lanta den nos diferente sintimentunan: nan ta bini huntu na nos mente i kurason i nan ta krea un kontraste, un oposishon den nos. Nan ta laga nos pensa riba loke Hesus mes a pasa aden ora el a nase na Bètlehèm.

Di un banda rikesa, di otro banda pobresa. Nos por sigui pone den sekuensia: sklabitut - libertat; soledat - hermandat;

desesperashon - speransa; individualismo - solidaridat; korupshon - honestidat.

Tur ta situashonnan ku ta oponé i ku e Palabra di Dios ku nos ta proklamá den e anochi di Pasku ku ta resumí den LUS vs SKURIDAT

Asina profeta Isaias ta ekspresá: “E pueblo ku tabata dual den skuridat, a mira un gran lus. Nan tabata biba den skuridat profundo, pero un lus a bria riba nan. Bo ta laga nan basha ofer di alegria, Bo a duna nan un goso enorme ... pasobra un yuchi a nase pa nos... E ta karga e poder soberano riba su skouder(Is 9,2.6).

Si, rumannan, e Yu aki a kambia loke ta negativo den algu ku a yena mundu ku e frutanan positivo di Spiritu Santu amor, goso, pas, pasenshi, bondat... etc.

Dilanti di skuridat profundo ku mundu ta biba aden pa falta di fe, pa e pèrdida di balornan den e situashon di krísis ku Corona vírus a pone henter humanidat, Dios ta iluminá mundu ku e lus di Kristu, E ta nos rikesa berdadero, nos speransa, nos libertat, nos salbashon.

E ta bini pa kibra e yugo di egoismo ku ta reina, e gloria mundano, e siguridat basa di poder i korupshon. E ta kuminsá algu nobo... manera e palabra ta bisa, “Ata, mi ta bini pa hasi tur kos nobo”. (Rev 21,5).

Mi rumannan, mi ta deseá un Pasku kaminda Hesus ta okupá un lugá di honor den nos kas pa forma e iglesia doméstiko ku nos a kompartí durante e misanan di Ourora.

Risibí mi deseo di pas i rekonsiliashon pa nos tur, na un manera partikular pa nos enfermo, nos ansiano, pa tur esnan ku ta kuida nan, pa nos rumannan ku ta sera den lugá di korekshon, pa nos hóbennan, pa boso tur, un Felis Pasku di Nasementu di nos Señor Hesukristu!

Mgr. Luis A Secco, SDB

Obispu di Willemstad