WILLMESTAD – I-Animal ta un fundashon karikativo ku ta konsientisá i promové bienestar di tur bestia aki na Kòrsou atrabes di edukashon. Spesialmente pa e temporada aki di lockdown e fundashon a presenta un pensamentu sumamente positivo. E fundashon ta mustra riba e echo ku awor ku nos a bolbe bai den lockdown hopi hende ta bai kana den bario. Algu ku algun lo eksperensia komo fèrfelu ta e kachónan ku ta kana lòs riba kaya i dor di esaki nan ta sali kas ku pida palu. Pero fundashon I-Animal ta konsehá e hendenan pa ban kambia e forma di pensa. “Ki hubo si en bes di e palu sali ku algu di smak pa ofresé e kachónan? E ora ei bo ta asta gana un amigu ku en bes di blaf bo lo ta masha kontentu kada bia ku e mira bo i asina e kanamentu ta keda plasentero pa bo i e kachónan. Abo sin stress i e kachónan kontentu ku nan ko'i smak (kuki pa kachó, pida pan ku pindakaas of gewoon korrels).” I pa promové e idea I-Animal a bin ku e siguiente slogan: Pakiko kana ku palu manera ta bo enemigu, kaminda bo por kana ku un kos dushi i gana un amigu?