WILLEMSTAD.- Ayera durante di oranan di dia, funshonarionan di MEO a tene vários kontròl riba supermerkadonan na Kòrsou. E kontròlnan aki tabata despues di vários keho ku a risibí riba klientenan ku ta topa ku preisnan di webu hopi karu.

E kontròlnan a keda efektuá na ámbos Van den Tweel Supermarket, ámbos Mangusa Supermarket, Cost-U-Less i tambe Esperamos Supermarket. Na tur e supermerkadonan aki a kontrolá prinsipalmente e asina yamá “Scharel Eieren”.

Esakinan ta webu di galiña ku ta kana lòs i no ta galiña den kouchi manera e otronan. Na e supermerkadonan Mangusa, van den Tweel i Esperamos tabata bende e webunan aki mas karu ku normal.

Pero esaki ta debí ku nan mes ta kumpra e webu na un preis haltu kaba for di e krio di galiña ku ta bende e tipo di webunan aki. Ta bon pa bisa tambe ku lei konosé un tipo di webu sin importá ku ta esun será den kouchi òf esnan ku ta kana lòs. Esei mes ta motibu ku preis di makutu básiko tin un preis stipulá pa webu, pues niun kaminda no por bende webu mas karu.

E webunan tin un preis máksimo di Fl.0.41 pa un webu lòs, kaha di 6 ta Fl. 2.44 kaha di 12 ta Fl. 4.88 kaha 18 ta Fl. 7.34 i kaha/palèt di 30 ta Fl. 11.55. Tin di e supermerkadonan aki a baha e preis mesora na loke makutu básiko ta stipulá miéntras ku otronan a opta pa yama e doño di e krio di galiña i mand’é bin buska su webunan bèk.

Awor ku a atendé ku e supermerkadonan, MEO lo bai atendé tambe di un forma severo ku e krio di galiña responsabel pa e webunan.