WILLEMSTAD. - Sr. Ronny Cornelis di MEO a splika EXTRA ku despues di a haña hopi informashon di krèshnan ku no tin nan papelnan reglá, a pone ku nan lo sali i kontrolá tur krèsh.

E kontrol ta nesesario, sigur despues di e loke ku a konstatá ayera na Mamimas Krèsh, asina Ronny Cornelis a duna di konosé.

Cornelis ta di opinion ku no ta un kompania ku ta antène ku piki i “betonmolen”, pero ta ku yu di hende i pa kolmo bebi di 0 pa 4 aña.

Esaki ta nifiká ku e krèsh mester tin hende ku bon preparashon pa e tipo di trabounan aki.

MEO huntu ku Onderwijs, Wetenschap, Cultuur en Sport (OWCS) huntu ku SOAW i SVB ta realisando e kontrolnan i den kaso di OWCS ta diploma ta konta.

E grupo ariba menshoná a hinka un plan den otro i esaki a pone ku nan a harma un akshon ku nan ta bai kontrolá tur krèsh.