WILLEMSTAD.- Promé minister demishonario di St. Maarten, Luc Mercelina a anunsiá durante un konferensia di prensa djamars mainta ku el a disidí djaluna anochi pa pidi gobernadó pa disolvé parlamento i yama elekshon nobo. Despues ku djaluna 20 mei gabinete Mercelina I a kai debí ku parlamentario Kevin Maingrette e kita su sosten for di e koalishon di partidonan URSM, DP, PFP i NOW, Mercelina den oranan di anochi a manda un dekreto pa gobernadó, Ajamu Baly.
Den e dekreto aki Mercelina ta indiká ku a base di artíkulo 59 di areglo di estado e ta disolvé parlamento i yama elekshon nobo. Mercelina su intenshon ta pa yama elekshon riba término kòrtiku.
Segun Mercelina e desishon pa pidi pa disolvé parlamento no tabata unu fásil. E promé minister demishonario a bisa ku el a tuma kontakto alabes ku Konseho Supremo Elektoral relashoná ku organisashon di elekshon nobo.
Djamars Mercelina lo manda alabes un otro karta pa gobernadó pa entregá retiro di su gabinete, mirando ku e no tin sosten mas di un mayoria den parlamento. E desishon di Maingrette, segun Mercelina a kai komo un sorpresa grandi den seno di koalishon.
E ta konvensí sinembargo ku desishon di Maingrette pa tumba gobièrnu i forma un mayoria nobo ku partidonan National Alliance (NA) i partido UP ta basá riba motivashonnan personal i no tin nada di aber ku interes general di e poblashon di St. Maarten. Maingrette a pone su propio interes riba esun di pais i pa e motibu aki e promé minister demishonario ke pa bini ku elekshon nobo mas lihé ku ta posibel pa asina pueblo di St. Maarten disidí pa kore ku e tipo di polítikonan aki.
Durante e konferensia di prensa tur e ministernan di gabinete Mercelina a duna un bista di estado di gobernashon di St. Maarten. Mercelina a bisa ku na momento ku el a asumí funshon el a topa un pais fayit i a konkluí ku tabatin mal maneho di pais durante último añanan.
E mentalidat di gobièrnu tabata ku tur kos ta na benta. El a usa e propiedat di Mullet Bay komo ehèmpel pa ilustrá esaki indikando ku el a spera ku gobièrnu lo tabatin e promé opshon pa kumpra e propiedat, pero intenshon di gobièrnu anterior tabata pa bende Mullet Bay ku terser.
Segun Mercelina su gobièrnu ke traha un un sistema finansiero duradero i pone un fin na práktikanan di egoismo i kudishi. Gobernadó Baly sinembargo tambe tin un ròl grandi di hunga den e desishon ki dia ta organisá un elekshon nobo.
Baly a risibí djaluna tambe un akuerdo di koalishon nobo di NA, UP i Maingrette ku huntu ta forma un mayoria di 8 asiento den parlamento. Manera a yega di pasa anteriormente na St. Maarten, pero tambe na Kòrsou ku gabinete interino Pisas I, gobernadó por disidí pa instalá un gobièrnu interino enkargá ku e tarea pa organisá elekshon nobo.
Den e kuadro aki e ta determiná den ki periodo e elekshonnan mester tuma lugá.
