WILLEMSTAD.- Ta algu basta komun ku na momentu ku un hotèl nobo habri na un destinashon, ku semper e ta trèk hopi trahadó ku eksperensia for di kompanianan eksistente.  Na Kòrsou tambe esei ta pasando awor ku Sandals ta bai habri i nan ta buskando gran kantidat di trahadó.

E esfuersonan di Sandals ta hopi i sinembargo ta parse ku nan no ta logrando pa yena tur e vakaturanan ku hende lokal. Miles Mercera no tin mester di niun introdukshon den mundu di turismo di Kòrsou i Boneiru. Mercera kontestando preguntanan di EXTRA ta indiká ku Kòrsou por logra prepará trahadó ainda pa e industria di turismo.

EXTRA ta kòrda e proyekto Academie Hotèl den Punda, ku a kuminsá ku e preparashon di trahadó pa sektor di turismo. Na momentu ku pandemia a dal aden esei tambe a kai i no a lanta mas.

Kiko a pasa ku e programa ‘KLA PA TURISMO’ ku a kuminsá na 2019? Investigashon ku EXTRA a hasi ta mustra ku a para e finansiamentu i asina e proyekto ku ta train nos hendenan pa trabou a muri un morto silensioso.

Ta for di 2017 i 2018 a kuminsá ku preparashon di e proyekto di entrenamentu ‘KLA PA TURISMO’. Esaki tabata despues ku CHATA a realisá un investigashon riba e kantidat di kambernan. E tempu ei a wak a base di e kresementu den kantidat i kalidat di kambernan kiko lo tin mester na kapasidat i kantidat di empleadonan pa traha den sektor di turismo. Pues debidamente ta for di e tempu ei a kuminsá prepará. Na 2019 a anunsiá e proyekto Kla pa Turismo.

EXTRA a bai puntra dirigente ku e tempu aya tabata na kabes di CHATA ku ta Miles Mercera. El a konfirmá ku e proyekto Kla pa Turismo, a bira posibel kaminda sektor privá a hasi e kompromiso ku nan ta duna trabou garantisá pa por lo ménos 6 luna na esnan den training. Esaki ta un faktor importante debí ku tur esnan ku ta interesá no tin trabou, pues no tin entrada pa biba.

Ta nesesario pa e hende tin un entrada miéntras e ta bai skol skol i traha alabes. Tabatin alrededor di 300 pa 400 hende ku no tin preparashon ni eksperensia. Nan a kuminsá ku e básiko komo waiter, housekeeping i kushina.

Kòrsou tin chèns di logra ainda, Mercera ta enfatisá.

Pa Sandals Royal Curaçao ya kaba ta hopi lat, pero tin vários proyekto ku ainda ta den fase di konstrukshon i lo dura entre 8 luna pa 18 luna pa nan ta kompletamente kla. Den e periodo ei ta posibel prepará un kantidat relativamente aseptabel di hendenan lokal pa drenta e proseso laboral den industria di turismo.

Echo ta ku despues di tur e preokupashon ekspresá di parti di e sektor di turismo, gobièrnu i hinter komunidat ku no ta hañando trahadó pa Sandals Kòrsou, te ainda no a surgi ni un programa pa kuminsá prepará training masal di poblashon lokal i tur otro hende ku ke traha.

Dikon bai gasta sèn pa bolbe re-inventá e wil. Dikon no kue e proyekto “Kla pa Turismo” i start di nobo. Den 6 luna por logra hasi hopi i asina por sigui krea mas trahadó ku ta nesesario, kaminda ta desaroyá e hende su abilidatnan i na mes momentu e tin un entrada pa kria su famia. Di e forma aki ta atendé ku e problema serio di desempleo hustamente bou di e hendenan ku no tin niun edukashon pa nan tin un trabou, nan ta traha i gana nan pan dignamente.

Bèrdat na momentu ku covid-19 a yega tur hotèl i tur kos a paralisá, pero mundu a lanta para pa sigui drai. Tin hendenan ku a train durante di “Kla pa Turismo” ku no a haña chèns di traha nunka. Ta bon pa train nan di nobo i kuminsá ku otronan tambe. Den tempu di sra. Mc William komo minister di Ekonomia a papia di kuminsá ku ‘Kla pa Turismo 2.0” pero lamentablemente esei a keda te einan. A resultá ku hopi hende no tin internèt na kas, òf no tin laptop ni kòmpiuter pa sigui e lèsnan. Pero lèsnan no por a sigui den klasnan normal tampoko.