WILLEMSTAD - Dia 5 di yanüari último Venezuela a sera frontera entre e pais i islanan ABC i kasi 2 luna despues e último barkunan di fruta a bandoná Kòrsou. Apesar di e impakto fuerte ku e susesonan aki tabatin, Kòrsou a haña oportunidat pa por pensa riba un vishon konkreto pa ku Sha Carpileskade, den konsulta ku pueblo.

Ministerio di Desaroyo Ekonómiko (MEO) a konsultá ku pueblo i basá riba, entre otro, resultadonan di e konsulta aki, Konseho di Minister a bai di akuerdo pa mantené e merkado flotante. Banda di e merkado flotante, ku ta konsistí di barkunan Venezolano ku ta ofresé fruta, bèrdura i piská, lo por inkorporá aktividat di Horeca (tantu den dia komo anochi) i tambe benta di produkto lokal, manera kos di boka dushi i obra di man. Kaminda ta posibel lo integrá benta di e produktonan lokal den loke Kòrsou konosé komo e merkado flotante. 

Alabes Konseho di Minister a bai di akuerdo pa amplia e puntonan di benta pa kunukeronan lokal, kuminsando ku puntonan di benta na Marshe Nobo.

Un di tres desishon relatá na desaroyonan rondó di Sha Caprileskade ta enserá lantamentu di un grupo di trabou, ku lo ta enkargá ku, entre otro, stipulashon di reglanan adishonal pa garantisá un ambiente higiéniko na e merkado flotante i den su alrededor. Un ke otro komo parti di e asina yamá “standplaatsvergunning” den su totalidat. Alabes e grupo aki lo stipulá e kantidat di barku máksimo pa benta di tantu fruta i bèrdura komo piská, ku tin mag di bende na Sha Caprileskade. Banda di kantidat di barku, nan lo stipulá tambe e kantidat di miembro di tripulashon ku por tin riba kada barku. E grupo di trabou lo efektuá ademas un análisis di rísiko, por si akaso mester sosodé ku Venezuela ta bolbe implementá e embargo. Ta di mas bisa ku den e análisis di rísiko, lo proponé maneranan kon pa atendé ku e rísikonan aki tambe.

Pa mas informashon por tuma kontakto ku MEO na 462 14 44.