WILLEMSTAD – Un otro kandela grandi, e biaha aki den área di St. Joris sigur a pone brantwer bou di hopi preshon despues di e situashon ayera i awe na Heintje Kool. Na St. Joris un kantidat grandi di mèst/kompost a pega kandela. Brantwer sigur hopi kansa mester a aktua aki tambe i dado momentu asta awa lo mester a kaba. Segun informashon ku EXTRA a risibí, e kandela a desaroyá den un área kaminda tabatin montonnan grandi di mèst. Bon trabou atrobe di brantwer a domina e situashon.

Riba imágennan di drone ku EXTRA a risibí por mira e magnitut di e área afektá. Un parti grandi di e tereno a keda kompletamente kimá, miéntras ku huma ta sigui sali for di diferente punto.  E kandela a laga un área ekstenso kubrí ku shinishi i restonan di material kimá. Den diferente parti di e tereno por mira ku huma ainda ta saliendo for di e montonnan di mèst. Te na e momentu aki no tin informashon konfirmá tokante kiko a kousa e kandela. EXTRA ta sigui e desaroyo di e situashon.