Mercelina preokupá ku rumbo di pais

WILLEMSTAD.- Loke partido MFK ta hasiendo ta tira santu den wowo di hende i no tin nada di aber ku e partido no ke traha mas ku sierto parlamentarionan. Ta p’esei ta importante ku poblashon ta haña un bon formashon i tin konosementu di prosesonan demokrátiko den pais.

Asina parlamentario pa Partido Nashonal di Pueblo (PNP), Gwendell Mercelina ta deklará pa EXTRA relashoná ku e akontesimentunan ku lidia siman pasá na un kiebro den e koalishon entre MFK i PNP. E ta bisa ku asta personanan den funshonnan ku mester sa mihó falta konosementu.

E falta di konosementu aki ta bira asta un peliger pa demokrasia di pais. “Esaki miéntras ku konosementu mester hustamente fortifiká bo demokrasia”, Mercelina ta bisa.

Pa splika su punto mas aleu, Mercelina ta indiká ku no ta promé biaha ku MFK a trata na fòrsa un kiebro den koalishon. El a referí na 15 febrüari 2023 momento ku a yama prensa pa duna entrevista pará dilanti un restorant den Saliña pa bisa ku tin dudanan pa sigui traha huntu. “Si frakshon di PNP ta malu mester a saka nos for di gobièrnu.”

Segun Mercelina tabata despues ku den reunion di parlamento di e dia ei ku frakshon di PNP a pidi pa hasi un investigashon riba Caribbean Petroleum Refinery (CPR) ku MFK a asumí e posishon. CPR tabata e kompania ku tabata negoshando kuné pa tuma maneho di refineria Isla.

“Si frakshon di PNP no a eksigí e investigashon aki gobièrnu lo a sigui negoshá ku ‘crooks’ (bandidu). P’esei e deseo pa PNP no ta den koalishon pasobra ta PNP ta tene e balansa.”

Segun e parlamentario tin mas señal ku ta duna indikashon ku pa algun tempu kaba MFK no ke a traha mas ku PNP. “Riba sosial media por lesa komentarionan di minister Charles Cooper (MFK) kaminda otronan ta reakshoná bisa ku si ta na México lo a mata e parlamentarionan di PNP.”

Mercelina ta mustra ku ta e tipo di pensamentunan aki a hiba entre otro Venezuela na e situashon ku e ta aden pa algun aña kaba. “Na Kòrsou tambe nos ta den direkshon di un outokrasia i no pa fortifiká nos demokrasia.”

Mercelina: “Si bo ta kòrda preguntanan ku mi a hasi 9 di mei 2023 riba e tópiko di eksonerá debe di impuesto no por bisa durante kontinuashon di e reunion mas ku 1 aña i 5 luna despues despues ku mi a sorpresá e minister ku nada. Esaki ta un prueba mas ku ta èksküs MFK ta buska pa e fòrsa un kiebro.”

Mas aleu e parlamentario ta bisa ku awor tur hende por komprondé tambe dikon a krea un presedente den parlamento ku nombramentu di lider di delegashon di komishon di VVRP pa bai riba biahenan den eksterior. “Minister Cooper, partido KEM i Corine Djaoen-Genaro tabata partísipe den esaki i despues ku a bin reklamo a kuminsá tira ku lodo tokante uso di droga durante un bishita parlamentario anterior na Colombia.”

E parlamentario ta karga speransa sinembargo ku e mayoria silensioso na Kòrsou ta tuma nota i komprondé loke ta pasando i al final ta tuma e desishon korekto.

Kómplise

Riba e pregunta dikon PNP mes no a saka su konklushon mas promé i sali for di e koalishon Mercelina ta bisa ku PNP ta forma parti di polítiko kaminda semper mester tin un balansa. Na su opinion PNP ta trese seriedat den gobernashon i frakshon di PNP den parlamento a asta hasi un mihó trabou di kontrolá gobièrnu kompará ku oposishon.

Esaki, Mercelina ta bisa finalmente, ta prueba ku e PNP no ta kómplise den nada, manera otro partidonan ke laga kere, i asta e frakshon tabata skèrpi riba su propio ministernan.

Foto:

...Gwendell Mercelina...