Rignald Cristina di Asosashon Tráfiko Sigur Kòrsou

WILLEMSTAD.- Si nos bai den historia, segun Rignald Cristina di Asosashon Tráfiko Sigur Kòrsou, por bisa ku na aña 1975, a establesé un rèkert den kantidat di morto den tráfiko, 35 kaso. Despues den añanan 80 por bisa ku ainda tabatin hopi aksidente ku fin fatal. Pero tin ku bisa si, ku un di e kousanan tabata e echo ku no tabatin lusnan di tráfiko i tampoko rotònde. Ku binida di esaki lamentablemente nos no por bisa ku e tráfiko a bira mas sigur; aksidentenan ku fin fatal a baha pero tòg a sigui hopi aksidente.

Bin bèk resien, na aña 2024 tabatin 10 persona ku a pèrdè nan bida den tráfiko, aña 2025, 11 persona i aktualmente den òktober den aña 2026 akí faltando un tiki ménos ku 3 luna pa aña kaba, nos ta na 12. I e kousa di e mayoria aksidente ta falta di preferensia. Aki ta para ketu i analisá e aksidentenan ku fin fatal; kon nan ta tuma lugá, kon outonan ta keda un manera hopi espantoso i kon shofùrnan tambe ta keda. Mester bin ku un kampaña pa konsientisá aun mas nos hendenan ku e outo ku nan ta manehá por ta un arma.
Nos komportashon den tráfiko ta laga hopi di deseá. Pues, den direkshon di influensiá nos komportashon nos mester bai pa asina spar e hendenan su bida den tráfiko, Cristina ta sigui splika. Mester para ketu i kuminsá un kaminda huntu ku gobièrnu i mas instansia pa e kampañanan aki.

Infrastruktura por hunga un ròl pero no mes determinante ku nos komportashon.
Aksidentenan di lus di tráfiko, te ainda tin hopi ta tuma lugá i mayoria biaha pa pasamentu den lus kòrá di tráfiko. Mas aleu, tambe tin kasonan di aksidente pa motibu di manehá bou di influensia di alkohòl pero e asosashon no ta risibí e resultado despues di investigashon di polis.

Cristina ta enfatisá ku aki na Kòrsou mester stòp di kuminsá algu i lag’é kaba na aros i koko, indikando ku no tin konsistensia den entre otro kontròl i sanshon. Un bon ehèmpel ta ora kuminsá ku kontròl riba vehíkulonan ku ta kore ku baki yená ku sushi no tapá, dos pa tres dia sigur ta haña outoridatnan para stratégikamente ta kontrolá despues ku masha video a bai rònt pero despues ta ketu. No tin niun kontròl mas.
Otro kaso mas ku ta hala atenshon i ta un peliger, ta skuternan ku ta oumentando den tráfiko. Pa promé nan no tin defensa i pa segundo, nan komportashon den tráfiko tambe ta laga hopi di deseá.

Komo asosashon, Cristina ta klousura splikando, ku nan ta dispuesto pa yuda durante e kampañanan ku lo por tin.