WILLEMSTAD.- E  hòmber Q.Lourens (33) ku a keda kondená  na 5 aña den un kaso di atrako di 15 mil florin algun luna pasá, mester a presentá den sala di korte pa labamentu di plaka.

Segun Ministerio Públiko Lourens a kumpra un vehíkulo marka Toyota Corolla ku e 15 mil florin ku el a hòrta for di su víktima dia 21 di ougùstùs 2020.

Pa loke ta trata e kaso di atrako, e akusado a bisa ku el ta bai korte di apelashon pa motibu ku e no ta esun ku a kometé e atrako.

El a bisa ku el a buska un persona pa atraká e víktima i kita e 15 mil florin for di dje, riba petishon di e pareha di e víktima mes.

Despues di e akto, e hòmber a dune solamente 5 mil florin.

Ku e sèn ei, el a kumpra algun kos manda pa su yunan muhé na Hulanda  i tambe frishidèr pa hende.

El a bisa ku el a kumpra e Toyota Corolla ku plaka di dos outo ku el a bende. Un Veloster i un Kia Rio.  E akusado a splika ku semper e tabata kumpra i bende outo. E kier a kambia e dos outonan ei pa e Corolla, pero e doño no a bai e dil ei. Despues el a pone e atvertensia riba “ vraag en aanbod” i a bende ámbos outo. Ku e sèn ei el a bai kumpra e Corolla.

Hues a relatá ku polis a hasi investigashon kaminda e akusado a kumpra e Corolla. E negoshante a bisa ku bèrdat e hòmber a bin serka dje ku dos outo pa kambia, pero e no a bai e dil.

Despues di algun siman Lourens a presentá ku 14 mil florin kèsh i kumpra e Corolla.

Banda di esaki, e akusado ketu bai ta keda insistí ku el a pèrdè su dos kadenanan ora ku reshèrshinan a bai hasi entrada hudisial den su kas. El a bisa ku tin un reshèrshi spesífiko ku e ta sospechá di a kue su kadenanan.

Ta manera e reshèrshi aki ke kita tur kos for dje, siendo ku e mes tin yen kas ta traha i tin gana di sa unda e ta haña sèn pa konstruí.

Segun e akusado e reshèrshi ta buska manera di kibr’e di tur banda.

Fiskal Hato- Willems a haña e akusashon di labamentu di plaka probá kontra di e akusado i a pidi hues pa konfiská e vehíkulo.

Despues ku hues a bai deliberá, el a bisa ku no tin niun prueba ku e sèn ku e akusado a kumpra e outo ta e plaka ku a keda hòrtá. E akusado mes a bisa ku ta 5 mil florin so el a haña i a splika kiko el a hasi ku e plaka.

Tambe esun ku a bende e Corolla a konfirmá ku e hòmber kier a kambia 2 outo serka dje pa e Corolla. Mirando tur esakinan hues a duna e akusado i su abogado Moenir Alam rason i a ordená pa e outo wòrdu entregá bèk inmediatamente.