Entretenimentu i balor históriko

WILLEMSTAD.- Punda, komo parti prinsipal di sentro di siudat di Kòrsou, mester di muchu mas tantu aktividat i muchu mas tantu bida. Esaki ta algu ku Ofisina di Turismo di Kòrsou ta di akuerdo kuné. Asina direktor di CTB, Muryad De Bruin, ta bisa den e ‘podcast’ ‘3or ku Gino’ riba plataforma digital di EXTRA.

Punda komo sentro históriko ketu bai ta e “postkaart” di Kòrsou. Apesar ku Punda no ta e Punda di ántes mas tòg tin desaroyonan interesante último añanan. Bèrdat ta ku tin hopi negoshi a sali for di Punda, pero Punda su balor históriko a keda i ta ofresé mas entretenimentu, De Bruin ta bisa.

Ta bai pa e distrito kompletu di entre otro Punda, Skalo, Pietermaai i Otrobanda i e balor históriko ku e área tin. E balor históriko aki ta algu ku turistanan tin interes den dje. Pero komo un sentro di siudat pa hasi kompra, esei no ta manera ántes mas.

Esaki tin di aber tambe ku realidat na mundu ku a kambia De Bruin ta bisa. “Unda ku bo ta na mundu, sintá tras di bo kòmpiuter bo ta hasi pedido di tur tipo di produkto ku bo ke. Loke ta importante ta e balor históriko.”

Mas aleu De Bruin ta mustra ku pa hasi Punda un área komersial interesante atrobe ta nifiká ku mester importá produktonan for di eksterior i ku mester paga impuesto riba nan, loke ta hasi nan mas karu. Si e turista kumpra e produkto mes gran parti di e sèn ta bai na importashon di produkto nobo i importashon atrobe.

Pero si wak Punda komo área di entretenimentu, historia i arte esaki ta enserá ku loke Punda tin di ofresé ta kosnan lokal, e turista ta paga pa un eksperensia úniko ku e ta paga p’é i e sèn ku e turista gasta ta keda drei den ekonomia lokal. Pues, e propósito di sentro di siudat di Kòrsou a kambia i ta konsentrá riba hóreka, e historia ku por konta di sentro di siudat i ‘tour’ (rekorido).

Mas aleu de Bruin ta bisa ku Otrobanda, tambe komo parti di nos sentro di siudat, tin otro tipo di dinamismo. Einan tin hopi mas hende ta biba. Proyektonan manera Kaya Kaya ta pone atenshon riba e desaroyo di Otrobanda ku a “upgrade” su mes i un área kaminda tin entretenimentu pa henter un dia.

Pues, segun De Bruin, mester wak sentro di siudat mas komo área di entretenimentu i no komo unu di hasi kompra. Pa loke ta e balansa di ofresé alabes benta di produkto den sentro di siudat, De Bruin ta bisa ku e produktonan outéntiko lokal di arte i artesania ta importante.

Pa loke ta bibienda De Bruin ta bisa ku esaki tambe ta biniendo tiki tiki bèk. Tambe ta bini mas hür di apartamento. Esaki tambe ta trese bida bèk den Punda pasobra tin mas moveshon di hende despues di 6or di atardi.

“Meskos ta konta pa Skalo i Pietermaai tambe. Den área di Pietermaai tambe tin hopi desaroyo ku butik hotèl, restorant i bar manera den Nieuwestraat. Sinembargo, ora ‘The Pyrmont’ habri na entrada di Penstraat, ta 300 kamber di hotèl nobo ta bini aserka i mester tin mas kos pa hasi pa e turistanan, pues mester krea mas kos pa hasi pa e turista.”

Esakinan ta habri oportunidatnan nobo pa krea mas bida den sentro di siudat. Komo ehèmpel De Bruin ta mustra riba ‘Punda Vibes’ ku ta tene tur siman. Esaki ta krea un moveshon grandi di hende ku ta drenta i sali Punda i ta boga pa mas di e tipo di dianan aki kaminda ta trese bida den sentro di siudat i ekonomia ta drei.

Foto