Cleopa: Ta ora pa asumí responsabilidat

WILLEMSTAD.- Den kuadro di relashonnan den Reino Hulandes, i tambe mirando e eskoho konsiente ku nos komunidat a hasi pa keda forma parti di e Reino, a yega ora pa Parlamento di Kòrsou, pa medio di su kontakto den (Interparlamentair Koninkrijksoverleg (Ipko) i gobièrnu di Kòrsou den su kontakto regular ku gobièrnu Hulandes, buta atenshon urgente riba bibienda pa estudiantenan kurasoleño bibá na Hulanda. Asina èks parlamentario, Eugene Cleopa, ta indiká.

E ta konstatá ku situashon aktual ta basta preokupante. Studiantenan ku ta bai Hulanda ta topa ku preisnan di hür di kamber eksageradamente haltu, debí ku kantidat di kas ta den man i ta manehá pa hendenan di mala fe. “E merkado mes tambe ta hasi e hóbennan vulnerabel, i fásil pa abusá di nan.”

E situashon akí, segun Cleopa, ta kousa ku mayornan no por drumi anochi i ta sinti un peso grandi riba nan lomba banda di un situashon finansiero desbalansá kaba ku nan ta biba aden debí na situashon finansiero, ekonómiko i sosial malu na Kòrsou. Pa e motibu akí Cleopa ta bisa ku loke ta pasa awe ku studiantenan na Hulanda por wòrdu kategorisá komo un inhustisia kontra desaroyo i futuro di Kòrsou.

Responsabilidat nashonal

Si Parlamento i gobièrnu di Kòrsou berdaderamente ke sirbi interes di e generashon di mañan, e tema akí mester bira prioridat number unu den IPKO i entre Gobièrnunan, Cleopa  ta sigui bisa. “Ta sierto ku Hulanda mes ta den un krísis nashonal di bibienda, i ku mayoria di partido polítiko ta trese esaki dilanti den nan kampaña, pero p’esei mes ta nesesario ku Kòrsou ta hinka pia den su propio interesnan, i buska solushon duradero i aseptabel pa nos estudiantenan. Mester asesorá Kas di Kòrsou na Den Haag ku urgensia pa e hunga un ròl esensial den esaki.”

Na  lugá di keda den un ròl di guia, Kas di Kòrsou mester bira esun ku struktural ta proveé bibienda sigur i aseptabel pa e studiantenan, Cleopa ta opiná. “Tur aña nos hóbennan ta topa ku mes problema, si nan bai via “Stichting Studiefinanciering Curaçao” (SSC) òf si nan bai riba inisiativa propio. Esnan ku SSC ta guia, despues di un aña nan mester buska otro kaminda biba, i e problemanan ta ripití nan mes.”

Statüt

E èks parlamentario ta sigui splika ku Statüt di Reino ta duna Kòrsou derecho i obligashon. Ta pa medio di e derechinan akí mester por garantisá ku hóbennan mester por skohe nan mes kaminda di desaroyo, pero segun Cleopa, den realidat esaki ta un ilushon pasobra konstantemente ta stroba nan pa falta di bibienda. “Bibienda pa mas aña sigurá ta un kondishon esensial pa éksito den estudio.”

Optené bibienda via relashon hurídiko serio ta protehá e studiante kontra di strès, abusu i situashon di kriminalidat. E problema akí no ta solamente unu familiar, sino di komunidat den su totalidat. Kòrsou kompletu mester uni tras di e tema akí i eksigí un posishon firme di Parlamento i gobièrnu den nan kontaktonan formal i material ku Hulanda, Cleopa ta bisa.

Aliado

Mas aleu Cleopa ta haña ku Parlamento i gobièrnu di Kòrsou mester ta aliado den e lucha akí. “Huntu nan mester duna Kas di Kòrsou un ròl muchu mas aktivo den atendementu di e problemátika. Esei por bai via di kontakto i kolaborashon ku e asina yamá ‘woningcorporaties’ na Hulanda, pero tambe via di propio inisiativa pa invertí den propiedat ku por adaptá pa ta kas pa studiante den e siudatnan, mas importante pa studiantenan kurasoleño.”

Aparte di esaki, Cleopa ta mustra ku no mester limitá diskushon solamente na e momentu di salida di e studiante. “Ta igualmente importante ku ta pone e diskushon riba mesa tokante e posibilidat pa studiantenan bini bèk despues di nan estudio. Pasó, kua ta e perspektivanan konkreto pa esnan ku ke usa nan konosementu pa bin sirbi nan pais?”

Lo ta iresponsabel, segun Cleopa, si prepará studiantenan bon pa nan logra éksito den eksterior, pero despues no tin ningun maneho pa stimulá òf fasilitá nan regreso.

Gritu

Finalmente Cleopa  ta indiká ku tempu pa sera wowo a pasa. “Kada aña nos ta manda nos hóbennan ku speransa grandi Hulanda, pero nos no ta protehá nan sufisiente kontra un merkado di bibienda ku ta hasi intento tur dia pa malversá e situashon i gana kantidat grandi di sèn riba lomba di nos studiantenan i desgrasia nan. Parlamento i Gobièrnu tin obligashon pa hasi algu struktural. E agènda di Ipko no por sigui limitá su mes na diskushonnan apstrakto i mester trata kosnan real ku ta importá pueblo. Bibienda pa e studiante ta un di e temanan mas urgente. Futuro di Kòrsou ta dependé di éksito di su hóbennan. Si nos laga bibienda stroba nan, nos ta stroba mes nos futuro.”

Foto:

Eugene Cleopa