WILLEMSTAD.- Tin diferente obligashonnan di belasting ku e organisadó di evento mester tene kuenta kuné, ta loke ku minister Javier Silvania ta skirbi den su karta pa su kolega Shalten Hato di hustisia. Resientemente minister Hato a introdusí su maneho di evento ku ta karga e nòmber di “Vibrando”. E maneho nobo ta pone enfoke riba pèrmitnan ku promotornan mester pa organisá evento na Kòrsou.

Minister Silvania den su karta ta splika tur e obligashonnan di belasting ku promotornan mester tene kuenta kuné pa paga. Eventonan kaminda artista internashonal ta bin presentá na Kòrsou, mester paga alrededor di 9,75% na belasting. Ora e promotor ta bini ku un artista for di eksterior i bai pidi un pèrmit na lokèt di pèrmit, e mester keda dirigí mesora pa SBAB (Stichting Belastingaccountantsbureau). Na SBAB ta yuda na yenamentu di informashonnan di dokumentonan di belasting. Ku e dokumento e promotor di evento mester paga “loonbelasting” promé ku e evento. Bou di esaki e promotor tin di paga belasting i premi nan pesnan di e organisashon ku ta traha durante e evento komo esnan ayudante tambe. Nan nòmber mester ta bon kla identifiká. Si esaki no te kaso nan lo kai den e asina yamá “tarifa anónimo” i lo kobra nan 46,5% di belasting.

Tambe minister Silvania ta rekordá e promotor ku mester entregá OB ku kobra riba tantu benta di ticketnan i otro produktonan. Mester paga winstbelasting pa promotornan.
Pa loke ta trata eventonan grandi tin otro regla ta konta. Ora ta papia di evento grandi, ta na momentu ku tin 4 artista internashonal ta duna presentashon na Kòrsou. Hasta tin regla ta konta pa organisashonnan karitativo ora di organisá eventonan grandi.
Pa eventonan ku ta di karakter lokal kompletamente mesun regla ta konta pa nan tambe, esta ku mester kumpli ku tur belasting.

Pues for di e perspektiva di belasting ta basta obligashon tin di kumpli kuné. P’esei for di e perspektiva aki ta konsehabel pa pone aspektonan di belasting tambe den e maneho di evento “Vibrando”. Asina ta evitá ku e organisadónan di evento ta kuminsá riba un mal pia pa loke ta trata e imágen kompleto di nan obligashonnan ku nan tin di kumpli kuné pa ku pais Kòrsou.

Teniendo kuenta ku loke a bin dilanti, minister Silvania ta pidi su kolega minister Hato enkaresídamente pa inkluí den e maneho di evento “Vibrando” e diferente obligashonnan di belasting ku e promotor mester tene kuenta kuné.