WILLEMSTAD.- Resientemente korte di promé instansia a trata kaso di menasa i destrukshon ku a tuma lugá den famia, ku a sali kompletamente fo’i man.
Ministerio Públiko ta akusá R.S. (35), ku a presentá den sala di korte pa responsabilisá su mes pa su akto.
E ta keda akusá di a menasá un miembro di su famia.
Tambe e ta keda akusá di a destruí vehíkulo di e víktima i tambe algun propiedat. Algun famia a deklará ku esaki no ta promé bia.
Segun e akusado, tur esaki tabata pa motibu di un diskushon ku a surgi entre e i un tio. Nan a diskutí pisá i asta sla a kai.
Segun rapòrt sikiátriko, nan ta konsehá pa interná e akusado den klínika Capriles, debí na e trastorno mental ku e ta sufri di dje, ku ta ser konsiderá komo paranoya sisofreniko.
Relashoná ku esaki, e akusado a bisa ku e no falta nada i no ta mira ningun motibu pa intern’é den Klínika Capriles. El a bisa ku e ta bon bon na su kabes i ta solamente ora ku nan busk’e problema e ta rabia demasiado hopi.
Fiskal a bisa ku e ta bai duna tur di su banda, pa asina yuda ku e akusado por haña un tratamentu adekuá. Fiskal a hasi demanda di 1 aña den klínika Capriles. Si bai bon den e promé 6 luna nan por evaluá e situashon. Na final hues a tuma e desishon, pa manda e akusado Klínika Capriles mas pronto posibel, pa asina e haña un tratamentu adekuá.