WILLEMSTAD.- Si e diskushon tabata riba e vírus di Covid mes awor e diskushon ta riba vakuna si òf no. Rudy Le Blanc direktor di Labdemed a bisa EXTRA ku e teknologia, e siensia tras di e vakuna ta unu fantástiko. E ta komprondé komo ta un situashon nobo i normalmente bo ta pasa un proseso di basta aña pa asepta un vakuna i hopi hende tin reserva i ripara si ta hasié si òf no. Pero último dokumentashon ta indiká ku e vakuna ku tin aki Pfizer, a pasa fase 3 di tèstmentu i awor aki e ta den evaluashon dor di FDA, ku ta nifiká ku ta e último parti di e trayekto ku normalmente un vakuna ta pasa dor di dje.

Le Blanc ta bisa ku e vakuna aki ta bastante seif pa loke ta e datonan ku tin te awor aki.

Pa loke ta berguensa ku tin di kibra pa ku e hendenan ku a haña Covid ku no ta papia riba dje  ku kisas por ta un konsientisashon pa otronan kon grave e situashon por ta, e direktor di Labdemed a bisa ku e hende ta stigmatisá e asuntu di Covid.

E ta kere ku mester ta kouteloso kiko ta papia pasobra hende ta bisa ku e kos aki ta simplemente un grip pero e no ta un grip. E proseso di inflamashon ku e vírus ta trese den pulmon di hende òf e organismo ta di tal forma ku e ta hopi hopi fuerte. Tin hende ta hañ’e mas fuerte ku otro i tin hende ku no ta haña síntoma òf síntomanan hopi leve i ei e peliger ta sinta. Nan ta kere ta un grip chikí, nanishi òf garganta ta morde dos tres dia i e hendenna ei por pasa e vírus pa otro, pasobra nan no ta sinti nada. E ta kere ku si mira den último 2 siman kuantu hende a fayesé, esei ta indikativo ku e vírus ta violento. E ta hopi fuerte i mester ta kouteloso kuné, mester kue kurpa.