Pa seguridat di tur keda protehá

WILLEMSTAD. - Durante e seshon di informashon di Gobièrnu pa loke ta trata e pandemia ku mundu ta bibando aden, ‘Bibando Sessions’, kaminda ku a start e diskushon di bakunashon i derechi laboral, Arthur Nivillac direktor di ARBO a bisa ku nan tin un ròl importante den e desaroyo aki.  ARBO tin di tene kuenta ku e derecho di e trahadó, pero tambe mester protehá tur dos banda. Komo ARBO, tin hopi aspekto manera seguridat higiena etcetera ku nan mester tene kuenta kuné i aspekto di manda hende traha na kas, tin hopi kos ku mester tene kuenta kuné.

Un kos ta sigur ku un trahadó no tin nodi di bisa su doño di trabou ku el a vakuná.

E trahadó por aserká ARBO i si e ke e ta notifiká e médiko di ARBO si el a vakuná òf no. E médiko aki no tin mag di duna e doño di trabou informashon médiko di e trahadó.

E loke ku ta hasi ARBO su posishon, kompliká ta e echo ku ARBO tin di wak e rísikonan i tin e tarea pa motivá e trahadó, konsehá e dunadó di trabou, adaptá e loke ku tin di adaptá pa e seguridat di tur keda bon protehá.

Pero ta un tereno fèrfelu, pa motibu ku no mag di duna informashon i tòg mester protehá tur dos banda Nivillac a bisa.

Nivillac a trese dilanti ku en bèrdat, tin hopi aspekto ku no a para ketu na dje i ku awor ta konfrontá kuné.

Tin hopi kos mas ta bin aserka banda di e diskushon vakuna òf no. Mester wak e ambiente na trabou. Nivillac a mustra riba e echo ku aktualmente ta hiba un diskushon riba vakuná, pero hopi biaha ora nan drenta un empresa, nan ta tuma nota di hopi otro aspekto ku mester di atenshon.

Masha poko empresa tin e espasio pa hende sinta dos meter for di otro.

Otro aspekto importante ta, e asuntu di taha na kas, pero pa traha na kas tin hopi kos ku mester tene kuenta kuné, pa motibu ku no ta kon ke ta manda un hende traha na kas.  Pues djis kue un “laptop” i manda e trahadó bai traha na kas. E lei laboral ta keda eksistí si e trahadó mester traha for di kas tambe.

Den un pandemia aki e aspekto di ventilashon tambe ta un reto i un di e aspektonan importante den e pandemia aki ta ku mester ventilá un empresa kada tantu ora ku e hendenan ta sintá den e espasio en kuestion. Kaminda ku hopi empresa no por o no tin ventilashon pa por ventilá e espasio, simplemente dia ku a konstruí e edifisionan, no a pensa riba e situashon di awe.

Pues na opinion di Nivillac e diskushon aki ta importante i p’esei ta bon pa bisa ku tin hopi otro kos ku mester atendé ku solamente papia di vakunashon.