Caritas: responsabilisashon finansiero na òrdu!

WILLEMSTAD.-E dianan aki a lanta kabes e nesesidat di fondo pa sierto organisashonnan ku ta brinda yudansa na hendenan den nos komunidat. Manera ta konosí e konosido aktor yu di Kòrsou jandino Asporat a organisá dos evento pa generá fondo. Via di e organisashon Cordaid ta kanalisá e fondonan pa yega e organisashon na Kòrsou Caritas. No ta asina ku sèn no a yega Kòrsou. Franklin Girigori di Caritas ta amplia.

E informashon inisial ku a yega mesa di redakshon di EXTRA ta mustra ku e plaka generá pa Jandino lo a bai Voedselbank  pero a resultá ku esei no ta asina. Voedselbank di Kòrsou no ta partner ku Jandino asina e organisashon mes a splika EXTRA.

E partner na Kòrsou ta Caritas. Tin vários kondishon ku mester tene kuenta i kumpli kuné. Girigori a duna di konosé ku Jandino a tene aktividatnan pa yuda Kòrsou, Aruba i Sint Maarten. A yega na palabrashon kon ta repartí e fondonan rekoudá i a enkargá e organisashon ku ta gosa di gran reputashon Caritas ku e distribushon. Caritas ta konosí pa mantené un banko di data aldia i tambe ku nan ta hiba un maneho finansiero korekto. Na Aruba i Sint Maarten a parti alrededor di 2900 pakete. Mester hasi e responsabilisashon finansiero, asina Girigori a sigui bisa.

Un di e kondishonnan di Jandino ta ku no por duna un hende mas ku un pakete. Mester yuda mas tantu hende posibel. E punto ta ku Krus Kora ta partiendo pakete i tambe SOAW i den koperashon ku Jandino a bisa ku mester sòru pa no tin hende ta haña mas pakete miéntras otro hende den nesesidat no ta haña nada.

Girigori a sigui splika ku e asina yamá ‘Samenwerkende organisaties’ ta trahando pa asina e grupo di siudadano ku no ta bin na remarke serka niun otro organisashon pa nan haña yudansa di Jandino. Den kombersashon ku Jandino a bini dilanti ku e ke algu pa futuro, i pa e motibu ei Caritas ta desaroyando dos proyekto duradero.

Pa awor aki importante ta pa evitá ku ta hasi mal uso di e yudansa i tambe ta tene kuenta ku e aspekto di privasidat.

Franklin Girigori ta splika ku nan ta kere ku Corona vírus lo no bai por lo pronto. Ta kalkulá ku pa e próksimo 2 pa 3 aña mester tene kuenta ku Covid-19. Den e kuadro ei mester bai traha riba plannan mas duradero. No ta asina ku sèn no  a bini, pero mester wak bon. Ademas tur dia tin hende ta bisa ku nan a pèrdè trabou. Mester evitá ku hende ta tuma pakete i bai organisá Bon Kuné. Mester organisá bon i evitá mal uso i p’esei Caritas a prepará un bon base di data. (file foto)