Historia di eksportashon aros, lechi, kòfi pa Oropa ta keda pèrsigui Kòrsou

WILLEMSTAD.- Ulanda mester bai paga Union Oropeo 18.5 mion euro (37.4 mion florin) pa derecho di importashon ku no a paga pa produktonan ku a eksportá di Korsou i Aruba pa Oropa. Esaki ta nifiká ku Ulanda a pèrdè e kaso den korte Oropeo, asina anp ta informá.

Korte Oropeo den e kaso ku Bruselas a entama kontra di gobièrnu ulandes a dikta sentensia den e kaso enkuestion. Kisas hopi hende no ta kòrda mas pero algun dékada pasá na Korsou tabata prosesá sierto produktonan manera aros, lechi, kòfi i suku anto tabata eksportá esakinan pa Oropa. E tempu ei Korsou i otro islanan di Antia a deskubrí e un fórmula nobo pa krea kupo di trabou. A habri fábrikanan ku ta prosesá suku i aros i ta manda e produkto Oropa. Hopi hende a haña trabou den e fábrikanan aki. A yega na un areglo ku Oropa ku Antia komo parti di Reino por a eksportá e produktonan sin ku mester paga derecho di importashon. E industria aki a kana bon te na momentu ku paisnan na Oropa a kuminsá introdusí kuota di eksportashon i importashon. Banda di esei a deskubrí kontrabanda den sierto di e lotenan ku a bai Oropa i tur esei a bin kibra e industria. Aros Alesie ta loke algun hende por ta kòrda ainda.

Segun korte Oropeo, den e periodo di 1997-2000 a eksportá lechi di puiru i aros for di Korsou pa Ulanda hasiendo uso di dokumentunan inkorekto. A base di esaki no tabata paga derecho di importashon. Mesun kos a sosodé den e periodo 2002-2003 ku grano i produktonan di aros for di Aruba. Esakinan a pone ku Union Oropeo a pèrdè di gana 18.2 mion euro for di Korsou i 300.000 euro for di Aruba. E komishon ta haña ku Ulanda ta esun responsabel i ta kobra Ulanda e plaka aki.