Juniel Carolina kla pa drenta Parlamento di Kòrsou

WILLEMSTAD.- E proseso pa atendé kredensialnan di Juniel Carolina (1966) a kuminsá, pa asina e miembro di partido MFK por drenta Parlamento di Kòrsou dentro di poko. Pa Carolina sirbi komunidat den e forma aki no ta nada nobo ya ku den pasado e tabata den Konseho Insular i tambe den Parlamento. Juniel Carolina no por bisa awor aki kua área e lo bai konsentrá su atenshon riba dje, pendiente deliberashon den e frakshon di MFK. EXTRA a puntr’e pa su opinion personal i riba esaki si e no mester a pensa ni un ratu. Na opinion di Carolina, a bira ora pa evaluá e asuntu di 10-10-10. Mester wak si kosnan ta bayendo bon. E ta bou di e impreshon ku kisas asta mester pidi despensa na pueblo pa loke a hasi kuné na 10-10-10.

Juniel Carolina a lanta awe mainta meskos ku tur dia i ta kla pa sigui traha manera tur dia. EXTRA a puntr’e si e ta sinti algu diferente awor ku e proseso a kuminsá pa e bira miembro di Parlamento di Kòrsou pa MFK. Riba esaki el a kontesta ku sirbi su pueblo den e kolegio di mas haltu di pais no ta nada nobo. E ta warda den tur trankilidat pa Konseho Supremo Elektoral i Parlamento atendé e partinan ku nan mester hasi. Carolina tabata miembro di Konseho Insular pa partido Frente Obrero di 2003 – 2007, despues na 2012 tambe el a bira miembro di Staten pa un periodo kòrtiku. Esei tabata e tempu ku Schotte a disolvé Parlamento miéntras ku e partidonan PAR, PNP, FOL i e dos independientenan Dean Rozier i Eugene Cleopa tabata formando un gobièrnu provisorio.

Tin hopi situashon di problema na Kòrsou, pero Carolina ta warda pa deliberá ku otro koleganan den frakshon di MFK promé ku e fiha su atenshon riba sierto áreanan di atenshon. Komo parti di un frakshon ta meskos ku forma parti di un tim i MFK su frakshon ta un tim.

Pidi Despensa

Carolina ta konosí pa un trahadó inkansabel tantu pafó komo den polítika. Trabounan sosial, limpiesa di Kòrsou, plantamentu i hopi mas. Den mayoria kaso e ta embolbí hóbennan pa siña nan e balor di trabou i tambe duna nan bon ehèmpel di komportashon i rèspèt.

Un di e puntonan ku tin Juniel Carolina preokupá ta e desaroyo di Kòrsou despues di 10-10-10. Su opinion personal ta ku mester evaluá di 10-10-10 pa wak si e kosnan ta bayendo bon. E ta bou i e impreshon ku kos tabata mal hinká den otro. A wak debe so, no a wak desaroyo i no a wak mantenshon. A konstruí un keshi tur na buraku. A drenta pais Kòrsou ku tur ámtenar malkontentu. Hopi servisio tin hendenan ku gana di taha pero nan promoshon i otro asuntunan ta keda wantá. Tin hopi mal kontentu. E ta kere asta ku mester pidi komunidat despensa pa loke a hasi na 10-10-10 pasobra e loke a hasi no tabata bon. Mester bai hasi hùiswèrk.