Mc William:

WILLEMSTAD.- Awor ku tin klaridat atrobe ku gabinete Pisas II tin un mayoria di sosten ku a lapi na otro den parlamento, mester trese klaridat riba nombramentu di ministernan nobo. Lider polítiko di MAN-PIN, Giselle Mc William ke sa ki dia Raymond Jamanika, ku ta kandidato pa miembro di parlamento Zita Jesus-Leito, ta hura pa bira minister.

Ta for di 20 ougùstùs ministernan Ruthmilda Larmonie-Cecilia, Ornelio Martina i Ruisandro Cijntje di Partido Nashonal di Pueblo (PNP) a entregá nan retiro serka gobernadó i asina e partido a kita sosten for di e koalishon entre PNP i MFK. For di e momento ei ku ta 3 luna ku ta ministernan di MFK so ta okupá tur kartera den gobernashon. Un situashon ku no ta deseabel denter di nos demokrasia parlamentario Mc William ta bisa.

Na su opinion ta ku rason ta biba den den nos pueblo i seno di gobièrnu di Reino un preokupashon grandi pa e sentido di balor i étika demokrátiko defisiente den e aktual gobièrnu di Kòrsou. Promé ku PNP a sali for di e koalishon ya kaba gabinete Pisas tabata konta ku sosten di KEM i e miembro independiente di parlamento Jesus-Leito tambe. Ambos frakshon hopi lihé a duna MFK sosten pa un koalishon i denter di 2 siman a negoshá un anekso na e akuerdo di gobernashon i a skùif Jason Fullinck i Jamanika respektivamente dilanti komo nan kandidatonan pa bira minister.

E proseso di screening di Jamanika i Fullinck a dura mas ku 10 siman, pero aparentemente entretantu a finalisá e screening. For di momento di aresto di lider polítiko di partido KEM, Michelangelo ‘Low’ Martines e proseso pa e kandidatonan hura i asumí e funshon di minister sinembargo ta wantá. Dikon a wanta e proseso pa tur 2 kandidato ta un misterio pa Mc William.

E ta bisa ku e no por imaginá su mes ku e 2 kandidatonan pa minister ta mará na otro manera ohochinan Siames i ke sa dikon Jamanika no a hura ainda. “Promé minister i alabes formadó, Gilmar Pisas, mester duna klaridat na komunidat.”, Mc William ta bisa.

E ta mustra kon e periodo di gobernashon di gabinete Pisas tabata un di esnan ménos transparente den historia di polítika na Kòrsou. “Gobièrnu no ta duna informashon na parlamento ni tampoko na komunidat pa medio di konferensia di prensa semanal di Konseho di Minister.” E falta di transparensia aki den e situashon polítiko ku ta reina, no ta aseptabel pa Mc William.

“Pisas mester stòp di skonde kara, asumí su responsabilidat i hasi anunsio ofisial di e status di su gobièrnu manera ta spera di un promé minister ku ta respetá su pueblo. Tambe mester duna splikashon dikon despues di 3 luna ainda e kandidatonan pa minister no a hura.” Mirando ku a dura 10 dia despues ku a arestá Martines pa el a manda su retiro komo miembro di parlamento, Mc William ta bisa ku e por komprondé ku ke warda riba e proseso pa un otro kandidato di partido KEM drenta parlamento, pero dikon a wanta nombramentu di Jamanika tambe, ta algu inkomprendibel.

Foto:

...Giselle Mc William...