WILLEMSTAD.- Sindikato Doen ta konfirmá i reafirma ku mester sera skolnan. Ayera e sindikato tabatin un reunion via Zoom ku bon partisipashon. Mas di 200 empleado di enseñansa a asistí via Zoom na e reunion ku sindikato Doen. EXTRA  a papia ku e presidente DOEN Marbella Felipa i el a bisa ku nan a keda para riba e posishon i awor mas fuerte mirando kon desaroyonan i kontagio den skolnan a bira.

“Nos ta konfirmá i reafirma ku e mihó kos pa hasi ta sera skol i usa e tempu pa prepará enseñansa Covid responsabel, loke awor no ta e kaso”, Marbella Felipa a bisa EXTRA.

Un plan di akshon muchu mas konkreto i konsiso ku awor no ta e kaso. E struktura  di un enseñansa si bolbe bin siere di skol tambe mester prepará. Ku e tres aspektonan aki, ta esensial pa trese trankilidat, pa nan ta ‘in place’ ora habri skol bek, si sera skol manera DOEN a proponé.

E reunion ku e trahadónan di enseñansa a aprobá un posishon den kual nan ta pone gobienru kompletamente responsabel pa tur loke bai robes den skolnan, pa bida i salu i delaster trahadó, alumno studiante, mayor i nan famia, si mantené skolnan habri den e normal bieu ku ta aplikabel den skol ketu bai.

“Kaminda nos no por tene distansia sosial i tin aglomerashon, uso di mas ku 50 porshento di espasio ku ta eksigiendo tur kaminda, tur e medidanan ku awor aki ta poniendo énfasis riba dje i den nos skolnan ketu bai ta drei normal bieu. Esaki ta violá e medidanan. E situashon aki nos ta konsiderá iresponsabel i delaster kolega, mirando e ambiente laboral no saludabel i no sigur, ku pidi nos konseho riba nan estado di salu pa ku e situashon aki, nos a konsehá nan, si nan no por funshoná debí na e ambiente no salu i no saludabel pa nan sigui prosedura di ziekte melding”.

I banda di aserka dòkter di kas, aserka tambe ARBO Consult segun sindikato DOEN.  Marbella Felipa a bisa ku no sigui imponé i sigui pretendé di traha den situashon nos saludabel ni pa nan ni pa nos alumnonan. E posishon aki DOEN lo pone pretu riba blanku i tur organisashon sosial di mayor i sindikato di enseñansa lo firme awe djaluna òf djamars i lo entreg’é na gobienru promé ku reunion di Konseho di Minister.