WILLEMSTAD.- E trayekto di mehorashon di skolnan na Kòrsou mester kontinuá kiko ku pasa, di akuerdo ku minister di Enseñansa, Siensia, Kultura i Deporte, sr. Steven Croes den deklarashon na EXTRA. E mehorashon ta danki na un regalo di 30 mion euro ku Hulanda ta regalá Kòrsou den kuadro di e Landspakket i COHO.
E minister di enseñansa a indiká ku e pandemia a afektá e situashon finansiero general di Kòrsou i e ministerio di enseñansa tambe a sintié i p’esei mester a kòrta den e ministerio. Pero e kòrtamentu no a mishi ku e punto prinsipal ku ta enseñansa. Por a keda duna enseñansa manera stipulá den lei. Pero ainda mester hasi hopi invershon den skolnan kaminda mester drecha skolnan i start ku e proseso di digitalisashon. Komo ku no tin e finansa nan nesesario e ta hasi e posishon den e sektor aki muchu mas difísil.
Sr. Croes a sigui bisa ku Hulanda a duna 30 mion euro, pero mester di mas sèn pa drecha tur skol i hasi nan full nobo.
Den kuadro di negosiashonnan di COHO, Hulanda a duna 30 mion euro ku ta alrededor di 60 mion florin. E suma aki mester keda usa spesífikamente pa drecha skolnan.
Aña pasá Kòrsou a haña mei mion euro pa e reparashonnan mas urgente ku mester tuma lugá. A disidí pa drecha daknan di skol ku ta lèk hopi, i tambe tualètnan kibra teniendo kuenta ku COVID i medidanan di higiena ku mester laba man. Den desèmber 2020 a kuminsá ku e ehersisionan di reparashon i fin di aprel a terminá ku drechamentu di tur e daknan di skol. Na sierto skol mester a baha e dak kompleto i pone un nobo nobo bèk. A drecha “goot” nan tambe. A terminá e promé parti dje trabounan aki.
I tin e sobrá di sèn ku ta alrededor di 29,5 mion euro. Mas aleu sr. Croes a indiká ku pa e 29.5 mion euro, gobièrnu di Kòrsou mester entrega un plan grandi kon ta bai drecha skolnan, i kiko tin di keda drechá.
Den luna di desèmber, Reda Sosial a bai tur, pero tur skol na Kòrsou pa inventarisá kiko tin kibra. A inventarisá tur kos manera man di porta kibrá, mester fèrf, bentana kibra, plafòn etc. A hasi un “assesment” di dje.
Tambe Aqualectra a bai tur skol pa mira e situashon di koriente. Esaki ta nesesario sigur den e kaminda nobo ku kier bai di digitalisashon. Mester tene kuenta ku edifisionan di skol tin hopi aña bieu, 50 aña. No por yega pega tantu laptop of otro aparatonan riba e koriente antikuá. Aqualectra a inventarisá kiko tin di keda kambia na e skolnan. Digicel tambe a bai tur skol pa wak kiko por kambia di infrastruktura pa e skolnan por risibí spit haltu di Internet. Tur esakinan a keda hasi. Tur informashon a keda pone den un rapòrt ku ya kaba ta riba kaminda pa Hulanda, pa Hulanda por duna nos e sobrá sènnan ku a primintí.
Minister Croes a bisa ku e mes personalmente a pasa na hopi skol. El a bira tristu di mira estado dje skolnan. P’esei e ta kontentu ku awor aki Hulanda a disidí di yuda nos. P’esei ta masha importante ku kiko ku pasa, mester kontinuá ku e proyekto di mehorashon di skolnan. Pasobra si e no sigui, ta e muchanan i dosentenan mes ta bai sufri.