WILLEMSTAD. - Apesar ku e splikashon tabata bastante kla ayera, tòg tin diferente persona no a komprondé ku balides di sédula ta konta pa 7 luna apesar ku el a kaduká.

EXTRA a papia ku hefe di Kranshi sra. Ruthline Haddocks i e tambe a keda konfrontá ayera ku diferente pregunta adishonal. Ta importante pa enfatisá el a bisa EXTRA ku na momentu ku e sédula ta bai kaduká pa traha sita pa renová esaki.

Manera EXTRA a relatá ayera aktualmente Asuntunan Públiko ta renobá un promedio di 120 en bes di 240 sédula pa dia. Esaki ta duna un indikashon ku aktualmente lo mester tin vários sédula ku a kaduká den sirkulashon aki na Kòrsou.

No tin un manera ideal pa aktualisá tur sédula mas rápido, komo ku mester limitá aglomerashon mas tantu posibel. Esaki komo un di e medidanan ku mester ehersé pa protehá nos mes kontra di e kontagio di COVID-19. Pa e motibu aki Kranshi, teniendo na kuenta ku e importansia pa un persona por identifiká su mes den kuadro di artíkulo 3 di e Landsverordening Identiteitskaarten, ta anunsiá ku un sédula, ku su balides a kaduká, ta haña un prolongashon di shete (7) luna.

I ta netamente riba e punto aki a surgi un ke otro malkomprondementu. E punto ta ku na momentu ku e sédula kaduká, mester traha sita pa renová esaki. Defakto mester traha un sita for di trempan, mirando ku aktualmente e fechanan pa sita pa sédula ta leu, mesun kos ta konta pa reibeweis.

Sra. Haddocks a bisa EXTRA ku nan a yega na palabrashon ku tur e instansianan kaminda e sédula ta di gran importante manera banko  Ministerio Públiko pa tene kuenta ku e 7 luna èkstra di balides.

Den kaso di sédulanan ku a kaduká na 2019 te asta promé ku yüni 2020, e prolongashon di 7 luna no ta konta ya ku nan mester a renová nan sédula kaba.

E hefe di Kranshi ta pidi pa tene bon kuenta ku e prolongashon i pa sigui traha sita normal.

Pa mas informashon semper por tuma kontakto ku Bentana di Informashon na Lokèt di Pèrmit na e number temporal ku ta 434-1690.