WILLEMSTAD,- Último dianan tabatin un konfushon di algun regla, ku tin den sistema di leinan di tráfiko, ku aparentemente gran parti di nos siudadano no sa di dje. Hopi di e shofùrnan ku a pasa eksámen di reibeweis den pasado, konosé e sistema di kuminsá ku e lès di kore, despues pasa eksámen di teoria i alabes esun di práktika.
Pero último tempu, a bin ta uza e sistema ku semper tabata tei den lei, ku ta indiká ku e siudadano mester slag pa su eksámen di teoria, promé i despues di esaki ta kuminsá ku su práktika di lès pa kore outo.
Tambe tabatin e disputa ku si un hóben ku ta den edat di 18 aña, pero no tin reibeweis ainda i ta siñando pa stür , por kore ku un siudadano mayor ku reibeweis, pero ku no ta un instruktor. Relashoná ku e preguntanan aki, EXTRA a yama bosero di kuerpo polisial Zwerwer i vários otro eksperto mas den e materia aki. Zwerwer a splika, ku enbèrdat hopi siudadano no sa ku tur tempu tabatin pará den lei, ku un persona ku ta bai pasa su reibeweis, mester slag pa su teoria promé i despues kuminsá ku su lès di práktika. Verbalisantenan pa hopi aña, no tabata hasi asina difísil ku e regla aki, pero awor últimamente si a kuminsá focus riba e kontròl i regla aki mas severo.
Pues promé ku un persona kuminsá ku su práktika di kore outo, e mester tin su dokumento ku el a slag pa teoria. Si polis par’e durante ku e ta tumando lès i e no por proba su dokumento ku el a slag pa teoria, tantu e komo e instruktor di lès ta haña but. Kada bes ku e persona sali pa tuma lès, e tin ku sali ku su dokumento. Pues ta bira ku un persona di 18 aña bai ariba no por kore ku un otro persona ku tin reibeweis pa siñ’e kore outo.