Lourens: Meskos ku a atendé ku Isla i ENNIA
WILLEMSTAD.- Meskos ku a buska solushon kreativo pa paga trahadó i penshonadonan di refineria Isla i buska solushon kreativo pa kompania di seguro ENNIA, meskos minister di Finansa i gabinete Pisas mester buska solushon kreativo tambe pa paga loke debe ámtenarnan. Asina presidente di sindikato STrAF ta trese enfátikamente dilanti.
Den kuadro di e deliberashonnan ku ta tumando lugá entre gobièrnu i e sindikatonan representá den Komishon Sentral di Sindikatonan riba eliminashon di e lei pa kòrta ku 12,5 porshento den kondishon laboral di ámtenarnan a informá na promé instante ku por paga indeksashon i “loontrede” 2023 na 2024 miéntras ta sigui papia riba e posibilidat pa paga esakinan pa añanan 2022 i 2021 tambe. Lourens ta bisa ku awor ta tende sinembargo ku ta paga indeksashon i “loontrede” 2024 na 2025.
Ounke ku e loke ta tende aki no ta un informe ofisial, e ta indikativo si pa e preokupashon ku ta biba serka e gremio sindikal ku ta representá trahadónan den sektor públiko. Pa Lourens no ta aseptabel ku no ta paga indeksashon di salario i “loontrede” di aña 2023.
“Kosto di bida a subi enormemente último añanan i ta sigui subi. Empleadonan públiko tambe ta sufri bou di esaki. Meskos ku gabinete Pisas i minister di Finansa, Javier Silvania a buska formanan kreativo pa paga trahadónan di refineria Isla i solushoná problema finansiero di ENNIA, meskos mester buska un solushon kreativo pa e debe ku tin na ámtenarnan tambe”, Lourens ta bisa.
Ta for di 1 luna pasá e sindikatonan ABVO, Sitek, NAPB, STrAF i SAP a manda un karta pa gobièrnu ku e petishon pa dialogá entre otro riba e lei di 12,5 porshento i debe na ámtenarnan, pero no tin boluntat di gabinete Pisas pa dialogá. “Ainda nos no a haña un kontesta serka gobièrnu i p’esei a manda un rekordatorio di nos petishon pa gobièrnu.”
SAP
Presidente di sindikato SAP, Amado Vilchez den deklarashon pa EXTRA tambe a trese dilanti ku gobièrnu a tòrnu na presupuesto pa hinka 30 mion florin pa 30 aña largu pa skapa kompania di seguro ENNIA i den e kuadro aki mester por tòrnu na presupuesto tambe kon pa paga e ámtenarnan loke debe nan. “Mi ta kere ku un gobièrnu ku ta yama su mes di pueblo, pa pueblo i huntu ku pueblo mester por buska solushon pa paga e ámtenarnan tambe ku ta nan trahadónan i alabes parti di e pueblo di Kòrsou.
Otro punto ku sindikatonan ke dialogá ku gobièrnu riba dje ta pago di e debe di “loontrede” i 3 porshento lumpsum 2020. Ta trata di un debe ku gobièrnu a rekonosé. Na desèmber 2023 a paga indeksashon di salario 2019 i 2020 pero falta pago ainda di “loontrede” i lumpsum.
Mas di e puntonan di preokupashon ta kambio di e lei di penshun. E kambio ta nesesario pa hasi posibel ku ta penshonadonan por haña indeksashon di nan penshun sin ku ta mara esaki na e kondishon ku ámtenarnan tambe mester tin derechi riba indeksashon di salario i basta ku e grado di kobertura di fondo di penshun, APC ta permití.
Alabes e sindikatonan ke tende ki dia minister di Finansa ta presentá den GOA pa duna informashon riba realisashon di e organisashon nobo di servisio di impuesto (Nieuwe Belastingdienst). Riba e proseso di solisitut den kuerpo polisial e sindikatonan ke tende ki dia minister di Hustisia, Shalten Hato lo duna un presentashon den reunion di GOA.
Finalmente e sindikatonan ke sa ki dia ta risibí e dokumentonan relevante relashoná ku un areglo pa ora un ámtenar kumpli 45 aña den servisio.
Foto:
…Juan Lourens…
