WILLEMSTAD.– Stichting Uniek Curaçao den desèmber 2020 a atvertí pa no mishi ku slak grandi ku nan a topa den Kabouterbos. ‘Ta konsehá pa no mishi ku e tipo di slak, pa motibu ku e ta karga un bakteria hopi peligroso pa salú di hende. Si mishi ku e slak aki, e persona ta kore e riesgo ku di por keda infektá ku e enfermedat igual ku Meningítis, ku ta un malesa sumamente peligroso.’ Otro nòmber pa e agaatslak ta ‘Giant African Snail’.

Parlamentario pa partido PAR Gisette Seferina ta hopi preokupá tokante plamamentu di agaatslak riba nos isla. Esaki ta un slak ku por kousa hopi daño na diferente tipo di vegetashon, manera spinazi i diferente fruta. Pero tambe e por ta peligroso pa hende.

Segun Michelle da Costa Gomez, eksperto di naturalesa, a siñalá e slak riba nos isla kaba for di 2013. For di e momentu ei diferente organisashon di medio ambiente a konsehá gobièrnu pa introdusí leinan pa stòp importashon di e slak, ku ta bin Kòrsou entre otro via tera ku nos ta importá. Segun Da Costa Gomez den e último añanan tabatin hopi agaatslak den bario di De Savaan. ‘Pero e slak a plamá rònt Kòrsou kaba. Entre otro via hende ku ta traha kurá i despues hiba sushi di kurá na landfill òf tira e sushi di kurá den mondi. Banda di esei tin hende ku ta traha den kurá i usa e mesun hèrmènt den e siguiente kurá. Ku esaki webunan di e slak, ku ta hopi pegahoso, por bai na otro destinashon.’

Gisette Seferina a bisa ku el a kuminsá ku un proposishon pa un lei nobo algun aña pasá. ‘Pero na un dado momentu, den kombersashon ku minister di Salubridat, Medio Ambiente i Naturalesa den e tempu ei, mi a traspasá e idea over na Servisio di e ministerio. Pero te ainda mi no a tende nada mas.‘ Seferina ta bisa ku Kòrsou a pèrdè hopi tempu kaba. Ta su intenshon pa e mes ta traha riba un lei pa evitá ku nos ta importá mas (webunan di) e slak via entre otro tera. Seferina: ‘Awor nos no mag di pèrdè mas tempu, pasobra nos mester stòp plamamentu di e slak pa protehá salubridat di nos pueblo.’