WILLEMSTAD.-Senso ta un instrumento hopi importante pa di e forma ei gobièrnu por haña informashon mas real i konkreto di desaroyonan den e pais aki. Sigur na Kòrsou kaminda mayoria siudadano ta bon konsiente ku na momentu di kambia kas nan no ta bai tur e instansianan pa hasi e korekshon. Hopi hende den e komunidat tin un òf konosí den nan serkania ku ta bisa ku despues ku un famia a muri despues di hopi aña ainda ta keda risibi karchi di votashon ounke tur hende sa ku si Kranshi no duna e dokumentu ku ta indiká ku e hende a fayesé no por tin entiero.

EXTRA ta kere ta importante pa kontribuí na senso den e kuadro ei. CBS a kuminsá nan kampaña di senso pero e no a biba niun dia den komunidat i pa kolmo a surgi un pleitu personal den públiko, riba retnan sosial i na radio, kontra di senso. Otro echo palpabel ta ku hulandesnan oropeo i nos propio milenionan a mustra reakshon kontra senso debí ku sea nan no a komprondé òf nan a kue e sistema ku na Hulanda no ta bishita kas di hende pa haña informashon.

EXTRA tin e informashonnan aki konkreto i solamente nos a konsulta ku direktor di CBS, pues no tin asuntu ku EXTRA no a komprondé splikashon riba loke ta pasando ku senso ni muchu ménos ku a saka niun deklarashon for di konteksto manera a keda ventilá den deklarashonnan na otro medio di komunikashon despues.

Senso ta protehá pa lei, esei ta otro echo i komo tal den e lei ku ta splika tur e motibunan dikon mester tene senso i kon mester hasié, e mesun lei ei ta mustra tambe ku e ta obligatorio. No tin asuntu ku ta CBS ta menasa niun siudadano, pero echo ta ku e lei ta indiká ku duna koperashon na senso ta obligatorio i asta por bai asina leu ku e ta kondusí na but i te maksimo di 5000 florin òf un sierto kantidat di dia será.

Ta palabranan hopi kla den e lei ku ta trata senso, pues ta bon pa informa i sigui konsientisá komunidat pa duna koperashon na senso. Si no ke invitá e enkuestadó den bo kas, sikiera na porta di kura òf den pòrch por risibi e enkuestadó i dun’e e informashon pa asina gobièrnunan por tin mihó informashon pa por traha maneho dirigí riba nesesidatnan den e pais aki.