WILLEMSTAD - Siman pasá, Minister Di Salubridat Públiko, Medio Ambiente i Naturalesa (GMN) a bishitá e kura di porko di rasa na AVB (antes LVV). E alohamentu di e porkonan ta laga hopi di deseá, tantu pa e porkonan komo pa e personanan ku ta kuida e porkonan. Kuido di porko di rasa ta un tarea prinsipal di AVB. E departamento ta enkargá pa laga e porkonan di rasa dèk, i ta bende e yunan di porko di rasa ku e kriadónan di bestia. Asina aki gobièrnu por garantisá ku pueblo ta haña karni di porko di bon kalidat.

Pero lástimamente ya pa hopi tempu no por laga e porkonan dèk, pa falta di espasio i pa falta di e fasilidatnan rekerí pa e porkonan por wèrp i pasa nan dia na un manera agradabel. Kriadónan di bestia ya tin muchu hopi tempu ta warda riba gobièrnu pa reanudá e programa di dèk porko di rasa.

Minister Girigoria a tuma akshon rápidamente. I huntu ku su konseheronan Pieter van Baren i Stanley Marks, nan a yega na un solushon pa remediá e situashon den kual e porkonan ta habitá. Denter di dos siman lo realisá un alohamentu di emergensia pa e porkonan. Despues de inmediato lo reanudá e programa di dèk. Minister Girigoria ta ekspresá su deseo pa pronto pueblo por gosa atrobe di karni di porko lokal, konfiabel i di kalidat haltu.

Riba e portretnan:

-Minister Girigoria, deliberando ku su konseheronan, Pieter van Baren i Stanley Marks

-Minister Girigoria ta inspekshonando e kura di porko na ABV