WILLEMSTAD.- Riba propio inisiativa resientemente Konseho Sosial Ekonómiko (SER) a duna su opinion i ofresé un vershon aktualisá di e impakto sosio ekonómiko riba konstrukshon di un hipódromo i pustamentu riba kareda di kabai aki na Kòrsou. A duna un vershon aktualisá di e impakto ya ku e rapòrt “Social Economic impact of the realization of the Hipódromo Almirante Brion in Curaçao” a duna na 2014. Primeramente SER tin su remarkenan  riba e struktura di akshonistanan pa loke ta lantamentu di e hipódromo. E lo ke a sa si esaki ta duna sufisiente garantia riba aspektonan manera finansiamentu i traspaso di akshonnan, i esei ku bista riba eksigensianan spesífiko di Financial Action Faskforce (FATF). SER ta kere ku mester dediká atenshon na e aspekto aki.

Mas aleu den e rapòrt di 2014 ta referí na un lei federal ku na 1995 a keda dekretá relashoná ku legalisashon di kompetensianan internashonal di kareda di kabai. T’asina ku desaroyonan riba internèt a krea tambe horizontenan nobo, unda islanan den aria di Karibe, partikularmente islanan ku ta avansá pa loke ta e kapasidat i rapides di internèt, en prinsipio lo por saka probecho di esaki dor di ofresé ‘offshore sports betting’. Pero SER ta kere ku den esaki ku asuntunan manera regulashon di e kuadro di supervishon ta di muchu mas importansia.

Na 2019 e balor dje merkado global pa loke ta ‘sports betting’ a ser kalkulá na $85 miar, i e balor mundial dje industria di hipismo a ser kalkulá na $300 miar.

Di akuerdo ku e rapòrt dje hipódromo na Kòrsou for di 2014, e entradanan for di pustamentu ilegal riba aktividatnan deportivo na Kòrsou pa e periodo di 2011-2012 a ser kalkulá na mas ku $245 trion. Esaki ta muchu mas grandi i mas tantu ku e sumanan ofisial ku ta ser menshoná den sports betting i e industria di hipismo na 2019. Pero na opinion di SER, den e kaso aki por papia di un balotashon ku no ta ser supstansiá den e rapòrt di 2014. Tampoko tin un motivashon akseptabel.

Mas aleu SER ta rekomendá gobièrnu pa laga verifiká i validá e sumanan menshoná den e rapòrt. Kaminda ta nesesario lo tin di hasi e korekshonnan nesesario pa asina por presentá un bista mas konfiabel di e fluho di plaka ku ta pasa den e mundu di sports betting en general i esun di kareda di kabai en partikular. Ademas ta rekomendabel pa laga un instansia independiente i ku personanan profeshonal hasi un estudio pa por presentá e aktualisashon dje impakto sosio ekonómiko.