WILLEMSTAD.- Riba un djasabra den luna di mei, for di 6:00 AM pa 12:00 PM, The Movies Curaçao, ANSO (Antillean Soap Company) i nan kompania mama, MetaCorp, orguyosamente a partisipá na CuraDoet 2025, uniendo huntu ku sentenáres di boluntario rònt di e isla pa duna bèk na e komunidat na un manera signifikante. CuraDoet ta e inisiativa boluntario di mas grandi na Kòrsou, organisá anualmente dor di Stichting DOET den kolaborashon ku Oranje Fonds.

E evento ta trese huntu individuonan, negoshinan i organisashonnan di tur sektor pa duna nan tempu, abilidatnan i kurason na vários proyekto di komunidat. For di pinta skolnan i sentronan di komunidat te na limpiesa di playa i sostené hende grandi. CuraDoet a bira un símbolo di solidaridat, kompashon i orguyo síviko rònt di e isla.

E aña akí, The Movies Curaçao, ANSO i nan kompania mama, MetaCorp, a uni pa refreská i revitalisá John F. Kennedy School. Ku kuashi, ròl i hopi zeta di èlebog, nos boluntarionan a pasa e mainta ta fèrf e área di ‘speeltuin’ i klasnan i tambe dunando e bankinan i wepnan un kara mas fresku. E meta tabata pa krea un ambiente mas briante i plasentero pa e studiantenan, un ku ta enkurashá siñamentu, hunga i di ta orguyoso di nan skol.

E esfuerso kolaborativo aki di MetaCorp i nan filialnan no solamente a embeyesé e espasio pero tambe a fortalesé e lasonan entre miembronan di tim i komunidat. Tabata un mainta alegre i produktivo yená ku trabou den tim, harimentu i e satisfakshon kompartí di hasi un diferensia real, un impakto real den e komunidat.

Na The Movies Curaçao, ANSO i MetaCorp nos ta kere den e poder di komunidat i kreando un impakto positivo. Partisipá na CuraDoet ta permití nos duna bèk na un manera palpabel, sostené skolnan lokal i inspirá otronan pa partisipá. Huntu, nos por konstruí un mihó Kòrsou.