WILLEMSTAD.- MetaCorp a inougurá ayera IMAX den Punda. Gerensia kompleto di MetaCorp tabatin tur intenshon di ta presente awe pa e evento importante aki ku ta koroná selebrashon di 100 añanan di eksistensia. Lamentablemente Covid-19 a stroba e traslado for di Aruba pero MetaCorp ta bon representá dor di Cor Dammers i demas koleganan. MetaCorp a nase na aña 1920 ku presentashon di e pelíkula mudo “Pashon di Kristu” den kurá di Hotèl Colombia na Oranjestad i poko tempu despues a muda pa e promé teatro ku a karga e nòmber di Sine Gloria.

Ta remarkabel ku invershonnan importante di MetaCorp na Kòrsou a tuma lugá na momentonan difísil, manera tabata e kaso ku Waterfort Boogjes na aña 1978 i Renaissance Hotèl i Riffort entre aña 2006 pa 2009. Awor atrobe, ta den un krísis finansiero i e pandemia di Covid-19, pero MetaCorp ta inougurá su renovashon kompleto di The Movies na Punda ku e nobedat sinematográfiko di IMAX. Djis pa duna un idea di e proyekto aki, solamente e sistema di proyekshon di IMAX a kosta un mion di dòler, sin konta demas invershonnan den e sala i otro aspektonan na The Movies ku tambe a pasa den un kambio kompleto.

Promé ku fin di aña MetaCorp lo habri su teatro nobo na Aruba ku lo karga e nòmber memorabel di Teatro Gloria komo rekuerdo di nos prinsipio 100 aña pasa i esaki tambe lo konta entre otro e nobedat di un IMAX meskos ku esun ku a inougurá ayera.

MetaCorp ta spera ku The Movies i IMAX lo ta un atrakshon pa komunidat, kaminda por bin pasa momentonan agradabel i lubidá pa un ratu tantu difikultat ku nos tur ta pasando aden. Alabes, ta deseo di MetaCorp ku e inisiativa aki lo por stimulá mas invershon na Kòrsou ku ta asina nesesario pa lanta e ekonomia i kalidat di bida pa komunidat.

Renobashon The Movies Punda

Aña pasa a kuminsá ku renobashon den tur e sala nan na Punda. E 900 asiento a wòrdu baha te na 500. A hasi esaki pa duna  klientenan mas akomodashon, espasio I luho. Tur stulnan a wòrdu remplasá pa Rocker Seats. I e ‘stadium’ a wòrdu ahustá pa asina tin mihó bista riba e pantaya. Tambe a kambia tur  pantaya pa Wall to Wall silver screens.

E área di konseshon a haña un kara nobo ku un lobi kompletamente renobá.

I despues a bin IMAX.

Imax ta rekonosé pa pantaya grandi, ‘immersive sound’ I ‘laser projection’.

Pa por a logra tur e esaki nan, IMAX Experience a rekerí  pa nos subi nos sala ku 5 meter di haltura pa asina nos por a ahustá e pantaya di tal magnitut. Pa loke trata zonido, tin un total di 12 spiker repartí den e sala i un proyektor di laser ku ta proyektá hopi mas skèrpi riba pantaya. I pa pone chèri riba e bolo a inkluí un IMAX Lounge and Bar.