WILLEMSTAD – Relashoná ku e kaso lamentabel pa motibu di mal tempu ku un piskadó a bin fayesé na pir di piskadó, Meteo ta splika ku e tipo di mal tempu aktivo manera a alkansá nos isla durante djamars atardi, ta sistemanan di wer ku ta difísil pa pronostiká dianan promé, i tin un durashon entre di 4 pa 6 ora (squall lines). Pues ku otro palabra e ta difísil pa emití un alerta hopi ora mas delantá promé ku tipo di sistemanan asina aki alkansá nos isla.

Servisio Meteorológiko a vigilá e área di mal tempu durante di djamars mainta, na momentu ku tabata tin un área di mal tempu west di e isla di Aruba ku tabata move lentamente den direkshon ost. Despues di 2:00 or trai mèrdia e wer ku ta konsentrá riba e isla di Aruba tabata duna indikashon ku e lo no bai debilitá mas pero lo sigui desaroyá i move den direkshon di Kòrsou i Boneiru. Na e momentu ei Meteo a kuminsá tuma kontakto ku entre otro “havenmeester” di Kòrsou i sektor di aviashon.

Alrededor di 2:30 or trai mèrdia Meteo a emití su promé boletin speshal di prekoushon pa posibel mal tempu pa media i públiko.  Na momentu ku e wer tabata aserka e isla di Kòrsou, esaki a sigui intensifiká rápido. Pa e motibu aki Meteo a emití un di dos boletin speshal “vigilansha” (Kódigo Oraño 15:35) pa mal tempu. Na momentu ku e área di wer a yega e parti sùit i sùitwèst di Kòrsou, e wer di mas aktivo a krusa riba e parti wèst di e isla.

E kantidat di yobida ku a keda registrá na Soto ta 19 mm i 15 mm na Hato. Pa lokual ta trata rafaganan di bientu durante pasashi di e sistema, Meteo a registrá un máksimo di 31 nudo (55km/o) for di direkshon wèst. Debí na e direkshon wèst di bientu e impakto mas grandi tabata riba e kondishon di laman na e parti wèst i sùitwèst di Kòrsou. Den e edishon di imprenta mayan di EXTRA lo tin e relato amplio i kompleto aki di Meteo.

Meteo su mishon: Vigilando wer 24/7 pa protehá bida i propiedat. Meteo ta sigui
enkurashá tur hende interesá pa registrá pa risibí boletin speshal via di nos
Whatsapp (+59995601089)

 

LAGA UN KOMENTARIO

Please enter your comment!
Please enter your name here