WILLEMSTAD – Awe mainta Korsou a lanta muha despues ku den oranan di marduga awa a kai kompanja pa welek i bos. Segun pronóstiko di tempu pa Kòrsou i bisindario, tempu lo keda parsialmente te hopi nublá ku algun áwaseru lokal kompañá pa posibel welek i bos. Temperatura máksimo lo alkansá 33ºC i temperatura mínimo 27ºC. Solo a sali 06:25 i ta baha 18:54 o.l.  Direkshon di bientu generalmente ost i moderá; forsa 3 te 4 (11 te 30 km/ora, 7 te 16 nudo). Prinsipalmente durante di áwaseru de bes enkuando basta fuerte den ráfaga; forsa 5  (31 te 39 km/ora, 17 te 21 nudo). Nubianan asosiá ku e ola tropikal situá riba Karibe oriental lo sigui plama riba nos área. Algun di e nubianan aki lo generá algun áwaseru kompañá ku posibel welek i bos riba vários parti di nos isla. Tambe e fluho di bientu lo keda generalmente moderá, kual lo pèrkurá pa un kondishon di laman relativamente trankil i un kalor poko sofokante. Sin embargo, durante di áwaseru ta antisipá ráfaga di bientu poko mas fuerte.

Kondishon di laman: Trankil te moderá ku altura di olanan entre di 0.5 i 1.5 meter (2 pa 4 pia).

Sistemanan signifikante di wer tropikal: Un ola tropikal situá riba parti oriental di laman Karibe tin 60% chèns pa desaroyá bira un siklon tropikal durante e próksimo 5 dianan. Servisio Meteorológiko di Kòrsou ta sigui e desaroyo di e sistema aki.

Perspektiva te djaweps mainta: Parsialmente te temporalmente hopi nublá ku chèns pa lokalmente algun áwaseru.