WILLEMSTAD – Den e informe di awe mèrdia Meteo ta indiká ku tòg ta eksistí e posibilidat ku algun partíkula di shinishi di e erupshon di e volkan na St. Vicent tòg por yega nos direkshon pa djárason. Manera ta konosí e volkan La Soufrière ta aktualmente un volkan aktivo riba e parti sùitost di Antia Menor i ta hopi probabel ku e erupshon nan lo kontinuá den diferente intensidat. Tur kos tabata dependé e direkshon di bientu e intensidat di e erupshon nan pa kua direkshon e shinishi lo bai. Pronóstiko ta ku gran parti di e shinishi lo bin abou serka i alrededor di e volkan mes. Sinembargo algun partíkula ku ta keda den e parti mas bou di atmósfera lo yega aki banda pa djárason i solamente lo influensia e vishon general. Servisio Meteorológiko di Kòrsou lo sigui monitor tur desaroyo di e volkan aki di aserka. Ademas lo tin presensia di un airu relativamente mas seku huntu ku santu di Sahara ku lo sigui impedí pa awa kai i manera a indiká kaba e vishon general lo keda redusí.