Lokalidatnan na kosta tene kuenta!

WILLEMSTAD.-Servisio Meteorológiko a tene un presentashon pa asina informa komunidat di e desaroyonan pa loke ta trata wer na Kòrsou. For di ayera hinter komunidat ta pendiente mirando ku tin un ola tropikal ta desaroyando den e área aki.

Meteorólogo Andy Luciano a duna splikashon kiko por spera. Meteo a mustra ku tin un konsentrashon di nubia ku ta generando áwaseru i algun ku welek i bos. Meteo ta antisipá ku e sistema aki ta move lentamente den direkshon di wèst. Ta kalkulá ku e sistema lo krusa e islanan ABC awe den oranan di anochi i tambe djabièrnè mainta.

Pa awe mainta kaba por a tuma nota ku entre Kòrsou i Boneiru tin basta áwaseru. Tin parti nan ku ta moderá i otronan ku welek i bos. Esakinan ta kana dilanti di e ola tropikal ku ta na kaminda. Durante di próksimo oranan te mayan mèrdia Meteo ta antisipá ku tipo di yobidanan, manera ta kai awor aki, lo sigui riba Kòrsou. E área ku Meteo ta konsentrá riba dje. Ta unda e sistema por desaroyá i bira un siklon. Meteo ta splika ku den e área tin un posibilidat ku e sistema por intensifiká. Te na e momentunan aki ta papia di un ola tropikal ku lo krusa Kòrsou den próksimo 24 ora. Meteo tin e situashon bou di kontrol  lo tene komunidat informa. Alerta na doñonan di boto chikí pa tuma prekoushon, tambe hotèlnan na kosta tene kuenta ku bientu ta kambia di direkshon i laman ta bira brutu, pues tene kuenta i tuma prekoushon.